Qazaqstan men UNFPA demografııa jáne áıelder quqyǵyn qorǵaý máselelerin talqylady
ASTANA. KAZINFORM — Quryltaı depýtaty, Halyqaralyq ister, qorǵanys jáne qaýipsizdik komıtetiniń múshesi Dana Medeýova Qazaqstan, Qyrǵyzstan jáne Túrikmenstan boıynsha BUU-nyń Halyqtyń qonystanýy salasyndaǵy qorynyń(UNFPA) óńirlik bólimshesiniń basshysy Chınve Ogbonnamen kezdesti.
Sondaı-aq kezdesýge Densaýlyq saqtaý vıtse-mınıstri Manas Ramazanov jáneQazaqstandyq qoǵamdyq damý ınstıtýtynyń basqarma tóraǵasy, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Juldyzaı Ysqaqova qatysty.
Taraptar Qazaqstannyń UNFPA-men yntymaqtastyǵynyń ózekti baǵyttaryn, sonyń ishinde demografııalyq damý, reprodýktıvti densaýlyq, genderlik teńdik, áıelderdiń quqyǵyn qorǵaý jáne olardyń qoǵamdyq-saıası ómirge qatysýyn keńeıtý máselelerin talqylady.
«Áıelder, beıbitshilik jáne qaýipsizdik» kún tártibin iske asyrý, áıelder men balalarǵa qatysty zorlyq-zombylyqtyń aldyn alý jáne oǵan qarsy is-qımyl máselelerine erekshe mán berildi.
— Kezdesý nátıjesinde taraptar syndarly dıalogty jalǵastyrýdyń mańyzdylyǵyn atap ótip, praktıkalyq yntymaqtastyqty damytýǵa, onyń ishinde áıelderdiń quqyǵyn qorǵaý jáne genderlik teńdikti nyǵaıtý máseleleri boıynsha zańnamalyq qyzmet sheńberindegi birlesken jumysty jalǵastyrýǵa nıetti ekenin bildirdi, — delingen habarlamada.
Osyǵan deıin Quryltaı Bıýrosy aldaǵy kezeńdegi zańnamalyq kún tártibin aıqyndaǵanyn jazdyq.
