Qazaqstan men Úndistan izdeýde júrgen adamdardy ustap berý jóninde kelisti
ASTANA. KAZINFORM — Qazaqstan men Úndistan Ustap berý týraly shartqa qol qoıdy.
Búgin Bas prokýratýrada Qazaqstan Respýblıkasy men Úndistan Respýblıkasy arasyndaǵy ustap berý týraly shartqa qol qoıý rásimi ótti.
Qujatqa Qazaqstannyń Bas Prokýrory Berik Asylov pen Úndistannyń Qazaqstandaǵy elshisi Sılas Tangal qol qoıdy.
Atalǵan Shart, Taraptardyń quqyq qorǵaý organdary qylmystyq jaýaptylyqqa tartý nemese sot úkimin oryndaý maqsatynda izdestirip júrgen adamdardy ustap berý úshin quqyqtyq negizdi retteıdi jáne ol jasalǵan qylmys úshin jazanyń bultartpastyǵy qaǵıdatyn qamtamasyz etedi.
Osy halyqaralyq qujat Qazaqstan men Úndistan arasyndaǵy qylmystyq is júrgizý salasyndaǵy sharttyq-quqyqtyq bazanyń qalyptasýyn aıaqtaıdy, óıtkeni eki el arasynda qylmystyq ister boıynsha ózara quqyqtyq kómek jáne sottalǵan adamdardy berý týraly kelisimder buryn qoldanysqa engizilgen.
Qadaǵalaý organy basshysynyń aıtýynsha, Shart Taraptar arasyndaǵy saýda-ekonomıkalyq jáne mádenı-gýmanıtarlyq baǵyttardyń júıeli damýyn eskere otyryp, erekshe mańyzǵa ıe qujat.
Qazaqstanda farmatsevtıka, taý-ken, medıtsına jáne tamaq ónerkásibi salalarynda 600-den astam úndi kompanııasy jumys istep keledi.
Elimizde bilim alyp jatqan sheteldik stýdentterdiń arasynda Úndistan 1-shi oryndy alady. Tek 2025-2026 oqý jylynda 10 myńǵa jýyq úndistandyq stýdent Qazaqstanda bilim aldy.
Sondaı-aq, sońǵy jyldary týrızm salasyn qosa alǵanda, eki el azamattarynyń ózara saparlar jasaýynyń artýy baıqalady.
Memleketaralyq baılanys pen azamattardyń mobıldiliginiń artýy ekonomıkalyq jáne gýmanıtarlyq yntymaqtastyqty damytýdy ǵana emes, sonymen birge qylmysqa qarsy is-qımyl salasyndaǵy memleketterdiń kúsh-jigerin biriktirýdi de talap etedi.
Halyqaralyq yntymaqtastyqty kúsheıtý jónindegi jumys burynǵydaı Qazaqstan Respýblıkasy prokýratýra organdarynyń qyzmetiniń basym baǵyty bolyp tabylady.
Aıta ketelik Qazaqstan men Úndistan taýar aınalymyn $1 mlrd-qa deıin arttyrýdy kózdeıtini týraly jazǵan edik.
