Qazaqstan men Úndistan quqyq qorǵaý salasyna qos dıplomdy mamandar daıarlaıdy
ASTANA. KAZINFORM — Astanada Qazaqstan Іshki ister mınıstrliginiń Basqarý akademııasy men Úndistannyń Ulttyq sot saraptamasy ǵylymdary ýnıversıtetiniń (NFSU) birlesken qos dıplomdy magıstratýra baǵdarlamalary iske qosyldy. Bıyl baǵdarlamaǵa 20 adam qabyldandy. Bul týraly Ǵylym jáne joǵary bilim mınıstrligi málim etti.
Magıstratýra baǵdarlamalary quqyq qorǵaý qyzmeti, tsıfrlyq krımınalıstıka jáne aqparattyq qaýipsizdik, sondaı-aq kıberqaýipsizdik baǵyttaryn qamtıdy.
Oqý barysynda zamanaýı tehnologııalardy qoldanýǵa, qylmystardy tergeýdiń jańa ádisterine, IT-sheshimderge jáne kıberqaýipterdiń artýy men jasandy ıntellektiniń keńinen engizilýi jaǵdaıyndaǵy basqarý tásilderine basymdyq beriledi.
Baǵdarlama túlekteri Qazaqstannyń memlekettik úlgidegi dıplomymen qatar, Úndistannyń NFSU ýnıversıtetiniń dıplomyn alady. Oqý aǵylshyn tilinde, ECTS kredıttik júıesi boıynsha júrgiziledi. Stýdentter Úndistanda taǵylymdamadan ótip, sheteldik sarapshylarmen birlesip jumys isteý múmkindigine ıe bolady.
Úndistannyń Ulttyq sot saraptamasy ǵylymdary ýnıversıteti – sot saraptamasy, tsıfrlyq krımınalıstıka jáne kıberqaýipsizdik salalaryna mamandanǵan beıindi joǵary oqý orny. Úndistan qylmystardy tergeý men qaýipsizdikti qamtamasyz etýde zamanaýı tehnologııalardy qoldaný baǵytynda aıtarlyqtaı tájirıbege ıe.
QR Ǵylym jáne joǵary bilim mınıstriniń mindetin atqarýshy Saıasat Nurbek bul joba eki eldiń tájirıbe almasýyna múmkindik beretin birlesken akademııalyq alań qalyptastyratynyn atap ótti.
Baǵdarlamany iske qosýǵa 2025 jylǵy shildede ótken kelissózder negiz boldy. Aldaǵy ýaqytta taraptar birlesken ǵylymı zertteýler júrgizýdi, akademııalyq almasýdy damytýdy, sondaı-aq tsıfrlyq krımınalıstıka, kıberqaýipsizdik jáne jasandy ıntellektini qoldaný salalarynda ǵylymı kadrlar daıarlaýdy josparlap otyr.
Bul seriktestik jańa býyn mamandaryn daıarlaýǵa arnalǵan turaqty halyqaralyq alań qalyptastyryp, Qazaqstandaǵy joǵary bilim berýdiń halyqaralyq deńgeıge shyǵýyna yqpal etedi.
Al elde jalǵan dıplomdar úshin qandaı jaza qarastyrylǵan myna siltemeden oqyńyz.
