Qazaqstan men Úndistan krımınalıstıka jáne tsıfrlyq tergeý boıynsha birlesken baǵdarlama ázirleıdi

ASTANA. KAZINFORM – Qazaqstan men Úndistan birlesken bilim berý baǵdarlamalaryn iske qosýdy josparlap otyr. Bul týraly Ǵylym jáne joǵary bilim mınıstrliginiń baspasóz qyzmeti habarlady. 

Ǵylym jáne joǵary bilim mınıstrliginiń ókilderi Іshki ister mınıstrliginiń ókilderimen birlesip, Úndistan Respýblıkasynyń áriptesterimen quqyq qorǵaý organdarynyń qyzmetkerlerin daıarlaý jáne kásibı tájirıbe almasý máselelerin talqylady.

Halyqaralyq yntymaqtastyqty damytý aıasynda qazaqstandyq delegatsııa sot saraptamasy, krımınalıstıka, tsıfrlyq saraptama jáne sot medıtsınasy salalarynda mamandanǵan Úndistannyń jetekshi joǵary oqý orny — Úndistan Ulttyq sot saraptamasy ýnıversıtetine (National Forensic Sciences University) bardy.

Kelissózder barysynda taraptar zamanaýı bilim berý baǵdarlamalaryn engizý jáne tsıfrlyq krımınalıstıka salasyndaǵy ǵylymı-ádistemelik bazany damytý baǵytynda tájirıbe almasý múmkindikterin talqylady. Sonymen qatar Qazaqstan aýmaǵynda fılıal ashý múmkindigi qarastyryldy.

Qazaqstan Respýblıkasynyń quqyq qorǵaý organdary qyzmetkerleri úshin qos dıplomdy bilim berý baǵdarlamalaryn iske qosý máselesine erekshe nazar aýdaryldy. Atalǵan bastama krımınalıstıka jáne tsıfrlyq tergeý salalarynda mamandar daıarlaýda ozyq halyqaralyq tájirıbeni engizýge múmkindik beredi.

Taraptar birlesken bilim berý baǵdarlamalaryn iske asyrýdyń, professor-oqytýshylar quramy men tyńdaýshylardyń akademııalyq utqyrlyǵyn damytýdyń, sondaı-aq birlesken ǵylymı zertteýler júrgizý men biliktilikti arttyrýǵa arnalǵan mamandandyrylǵan kýrstar uıymdastyrýdyń joǵary áleýetin atap ótti.

Kezdesý qorytyndysy boıynsha taraptar aldaǵy yntymaqtastyqtyń negizgi baǵyttaryn aıqyndaıtyn tıisti hattamaǵa qol qoıdy. 

Aıta ketelik Qazaqstanda 35 myń sheteldik stýdent bilim alyp jatyr.