Qazaqstan men Úndistan BRIKS aıasyndaǵy yntymaqtastyqty keńeıtýdi talqylady
ASTANA. KAZINFORM – Qazaqstan Respýblıkasy Syrtqy ister mınıstriniń birinshi orynbasary Erjan Ashyqbaev Úndistan Respýblıkasynyń Qazaqstan Respýblıkasyndaǵy elshisi ıA.K. Saılas Tangalmen kezdesý ótkizdi.
Kezdesý barysynda taraptar qazaq-úndi strategııalyq seriktestiginiń ózekti máselelerin talqylap, saıası dıalogty odan ári nyǵaıtýǵa jáne ózara tıimdi yntymaqtastyqty keńeıtýge múddelilikterin rastady.
BRIKS aıasyndaǵy ózara is-qımylǵa erekshe nazar aýdaryldy. E.Ashyqbaev úndi tarapyn «Tózimdilikti, ınnovatsııalardy, yntymaqtastyq pen ornyqty damýdy nyǵaıtý» uranymen ótip jatqan 2026 jylǵy birlestikke tóraǵalyǵymen quttyqtap, belgilengen kún tártibiniń tabysty iske asyrylatynyna senim bildirdi.
Qazaqstannyń BRIKS seriktes eli retinde saýda jáne ınvestıtsııalar, kólik baılanystylyǵy, tsıfrlandyrý, jasandy ıntellekt, energetıka jáne ornyqty damý sııaqty basym baǵyttardaǵy yntymaqtastyqty damytýǵa is júzindegi úles qosýǵa daıyn ekeni atalyp ótti.
Sondaı-aq, taraptar 12-13 qyrkúıekte Nıý-Delı qalasynda ótetin XVIII BRIKS sammıtine daıyndyq máseleleri, onyń ishinde aldaǵy is-sharanyń mazmundyq jáne uıymdastyrýshylyq aspektileri boıynsha pikir almasty.
Ekijaqty kún tártibi aıasynda saýda-ekonomıkalyq jáne ınvestıtsııalyq ózara is-qımyldy, onyń ishinde energetıka, kólik jáne logıstıka, asa mańyzdy mıneraldar, tsıfrlyq tehnologııalar, farmatsevtıka jáne aýyl sharýashylyǵy salalaryndaǵy yntymaqtastyqty keńeıtý perspektıvalary qarastyryldy.
Kópjaqty yntymaqtastyq turǵysynda E.Ashyqbaev Qazaqstan Respýblıkasy Prezıdenti Qasym-Jomart Toqaevtyń Halyqaralyq sý uıymyn, Bıologııalyq qaýipsizdik jónindegi halyqaralyq agenttikti jáne Alǵashqy medıtsınalyq-sanıtarlyq kómek jónindegi elderdiń jahandyq koalıtsııasyn qurý jónindegi bastamalary týraly habardar etip, Úndistannyń olarǵa qoldaý bildiretinine úmit artty. Taraptar sondaı-aq AÓSShK-ni odan ári damytý máseleleri boıynsha pikir almasty.
Kezdesý qorytyndysy boıynsha taraptar qazaq-úndi strategııalyq seriktestigin odan ári nyǵaıtý jolyndaǵy birlesken jumysty jalǵastyrýǵa daıyn ekenderin rastady.
