Qazaqstan men Úndistan áýe qatynasyn keńeıtýge nıetti
ASTANA. KAZINFORM – Marrakesh qalasynda ótken IKAO-nyń engizýdi qoldaý jónindegi jahandyq sımpozıýmy (GISS-2026) aıasynda Qazaqstan men Úndistan arasynda áýe qatynasyn damytý máseleleri talqylandy.
Іs-shara barysynda QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva Úndistannyń IKAO janyndaǵy Turaqty ókili Angshýmalı Rastogımen kezdesti. Kezdesýge Qazaqstannyń IKAO janyndaǵy Turaqty ókili Tımýr Tlegenov te qatysty.
Taraptar azamattyq avıatsııa salasyndaǵy ekijaqty yntymaqtastyqtyń qazirgi jaǵdaıy men damý perspektıvalaryn talqylap, áýe qatynasyn keńeıtýge erekshe nazar aýdardy.
– Qazaqstan men Úndistan arasyndaǵy qoldanystaǵy sharttyq-quqyqtyq baza áýe qatynasyn damytý úshin berik negiz bolyp tabylady. Qazaqstandyq áýe kompanııalary ushý geografııasyn keńeıtýge, sonyń ishinde jańa baǵyttardy ashýǵa jáne qoldanystaǵy reısterdiń jıiligin arttyrýǵa daıyn. Áýe qatynasynyń keńeıýi elderimiz arasyndaǵy saýda-ekonomıkalyq jáne týrıstik yntymaqtastyqqa qosymsha serpin beretinine senimdimiz, – dedi Saltanat Tompıeva.
Qazirgi ýaqytta Qazaqstan men Úndistan arasynda Air Astana áýe kompanııasy Almaty – Delı baǵyty boıynsha aptasyna 13 reıs, Almaty – Mýmbaı baǵyty boıynsha aptasyna 3 reıs oryndaıdy.
Kelissózder qorytyndysy boıynsha taraptar yntymaqtastyqty odan ári nyǵaıtýǵa jáne turaqty kólik baılanystaryn damytýǵa ózara múddeli ekenin rastady.
– Qazaqstan men Úndistan arasyndaǵy áýe qatynasyn keńeıtý eki el arasyndaǵy baılanysty kúsheıtip, jańa ekonomıkalyq múmkindikterge jol ashady, – dep atap ótildi kezdesý qorytyndysynda.
Aıta keteıik, Qazaqstan men Úndistan Úkimetteri arasyndaǵy áýe qatynasy týraly kelisimge 1993 jylǵy 10 qyrkúıekte qol qoıylyp, 1998 jylǵy 10 jeltoqsanda ratıfıkatsııalanǵan. Sonymen qatar 2015 jylǵy 19 qazandaǵy memorandýmǵa sáıkes, ár taraptyń tasymaldaýshylary aptasyna 21-ge deıin turaqty reıs oryndaı alady.
Buǵan deıin otandyq áýe kompanııa eki jańa ushaqpen tolyqqany habarlandy.
