Qazaqstan men Úndistan 122 mln dollarlyq eki kelisimge qol qoıdy
ASTANA. KAZINFORM- Chennaı qalasynda ótken Qazaqstan-Úndistan saýda jáne ınvestıtsııalar jónindegi bıznes-forýmynda jalpy quny 122 mln AQSh dollaryn quraıtyn eki negizdemelik kelisimge qol qoıyldy, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Kelisimderdiń biri Qazaqstanda Sonalika/Solis traktorlaryn qurastyrý men óndirisin kezeń-kezeńimen jergiliktendirýge baǵyttalǵan. Qujat «SPBKM» JShS men International Tractors Limited kompanııasy arasynda jasaldy. Joba aıasynda traktorlar men aýyl sharýashylyǵy tehnıkasyn jetkizý, qurastyrý, óndiristi jergiliktendirý, taratý jáne keıingi servıstik qyzmet kórsetý máseleleri qamtylady. Kelisimniń quny – 120 mln AQSh dollary.
Taǵy bir kelisim «SP BKM» JShS men Big Bang Boom Solutions Private Limited kompanııasy arasynda qorǵanys tehnologııalary, ishki qaýipsizdik jáne qosarly maqsattaǵy sheshimder salasynda jasaldy. Taraptar Qazaqstanda ózara tıimdi jobalardy birlesip anyqtap, baǵalap, iske asyrý múmkindikterin qarastyrady.
Qazaqstandyq delegatsııany Saýda jáne ıntegratsııa vıtse-mınıstri Aıdar Ábildabekov bastap bardy. Sapar aıasynda ol Tamılnad shtatynyń Saýda, ónerkásip jáne ınvestıtsııalardy ilgeriletý mınıstri Selvı S. Kırtanamen jáne International Tractors Limited kompanııasynyń atqarýshy dırektory Rahýl Mıttalmen kezdesti.
Bıznes-forýmǵa Qazaqstan tarapynan 110-nan astam ókil qatysty. Olardyń qatarynda elimizdiń ár óńirinen kelgen 65-ke jýyq kompanııa bar.
Olar mashına jasaý, agroónerkásip, tamaq ónerkásibi, farmatsevtıka, densaýlyq saqtaý, qurylys, munaı-gaz, jeńil ónerkásip, IT jáne logıstıka salalaryn tanystyrdy.
Kezdesýlerdiń negizgi maqsaty – qazaqstandyq jáne úndistandyq kompanııalar arasyndaǵy tikeleı baılanysty kúsheıtip, saýda kólemin arttyrý, ınvestıtsııa tartý jáne birlesken jobalardy iske qosý.
Forýmda óńirler arasyndaǵy baılanysty damytýǵa da basymdyq berildi. Aqmola, Atyraý, Mańǵystaý jáne Túrkistan oblystarynyń, sondaı-aq Shymkent qalasynyń ókilderi óz óńirleriniń eksporttyq jáne ınvestıtsııalyq múmkindikterin tanystyryp, úndistandyq kompanııalarmen birlesip jumys isteýge daıyn jobalaryn usyndy.
-Qazaqstan Úndistanmen saýda-ekonomıkalyq jáne ınvestıtsııalyq yntymaqtastyqty damytýǵa úlken mán beredi. Bizdiń qarym-qatynastarymyzdyń áleýetin tolyq paıdalaný úshin óńirler men bıznes ókilderiniń arasyndaǵy baılanysty kúsheıtý qajet. Sondyqtan Qazaqstan óńirleri men Úndistan shtattary arasyndaǵy tikeleı áriptestikti damytýǵa erekshe kóńil bólip otyrmyz, – dedi Saýda jáne ıntegratsııa vıtse-mınıstri Aıdar Ábildabekov.
Úndistan – Qazaqstannyń Ońtústik Azııadaǵy mańyzdy saýda-ekonomıkalyq seriktesteriniń biri. 2026 jyldyń birinshi jarty jyldyǵynda eki el arasyndaǵy taýar aınalymy 315,4 mln AQSh dollaryn qurady.
Qazaqstan Úndistanǵa eksport kólemin ulǵaıtyp, jetkiziletin taýar túrlerin kóbeıtýdi kózdep otyr. Qazirgi tańda eksportty shamamen 313 mln AQSh dollaryna arttyrýǵa múmkindik beretin 95-ke jýyq taýar pozıtsııasy anyqtaldy. Olardyń qatarynda metallýrgııa, hımııa, tamaq ónerkásibi, qurylys jáne mashına jasaý ónimderi bar.
Kezdesýler barysynda kólik-logıstıka salasyndaǵy yntymaqtastyq ta talqylandy. Qazaqstan Úndistan taýarlaryn óz aýmaǵy arqyly Ortalyq Azııa, Qytaı jáne Eýropa naryqtaryna jetkizýdi keńeıtýge múddeli.
Budan bólek, agroónerkásip, aýyl sharýashylyǵy ónimderin óńdeý, mańyzdy mıneraldar, ónerkásiptik kooperatsııa, farmatsevtıka, tsıfrlandyrý, jasandy ıntellekt, IT jáne energetıka salalary birlesken jobalar úshin perspektıvaly baǵyttar retinde qarastyryldy.
Qazaqstan úndistandyq ınvestıtsııalar men tehnologııalardy tartyp, elde joǵary qosylǵan quny bar óndiristerdi damytýǵa jáne ónimderdi jergiliktendirýge múddeli. Osy maqsatta úndistandyq kompanııalarǵa Qazaqstandaǵy arnaıy ekonomıkalyq aımaqtarda óndiris ashý múmkindikteri tanystyryldy. Qazir elimizdiń 14 óńirinde 17 arnaıy ekonomıkalyq aımaq jumys isteıdi. Olar ınvestorlarǵa daıyn ınfraqurylymmen qatar, salyqtyq jáne kedendik jeńildikter usynady.
Jumys sapary barysynda qazaqstandyq delegatsııa Chennaıdaǵy birqatar ónerkásiptik jáne ınnovatsııalyq kásiporyndarǵa bardy.
Olardyń qatarynda júk, jolaýshylar, qurylys, taý-ken jáne arnaıy tehnıkaǵa arnalǵan avtomatty transmıssııalar óndiretin Allison Transmission India Private Limited jáne dári-dármek óndirý men jetkizýge mamandanǵan Caplin Point Laboratories Limited farmatsevtıkalyq kompanııasy bar.
Osyǵan deıin Qazaqstan men Úndistan quqyq qorǵaý salasyna qos dıplomdy mamandar daıarlaıtyny týraly jazdyq.
