Qazaqstan men Úndistan eki elde sottalǵan óz azamattaryn jazasyn óteý úshin bere alady - Senat
ASTANA. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda «Qazaqstan Respýblıkasy men Úndistan Respýblıkasy arasyndaǵy sottalǵan adamdardy berý týraly kelisimdi ratıfıkatsııalaý týraly» zań jobasy talqylandy.
Eki el arasyndaǵy kelisimge 2015 jyly 8 shildede Astana qalasynda qol qoıylǵan bolatyn. Qujatqa sáıkes, Qazaqstan men Úndistan ár taraptyń sottarymen bas bostandyǵynan aıyrylǵan adamdardy óziniń azamaty bolyp tabylatyn memleketke jazasyn óteý úshin berýge mindetti bolady.
Kelisimge sáıkes, berýshi tarap qana qaıta qaraý týraly kez kelgen ótinish boıynsha óz úkimin qaıta qaraýǵa quqyly bolady. Óıtkeni bul másele sottalǵan adamǵa qatysty úkimdi oryndaýshy taraptyń tıisti organdarynyń quzyretin jatady.
Al olar sot nemese ákimshilik sheshimder shyǵarýǵa quqyly bolyp tabylady. Budan bólek, kelisimge sáıkes, sottalǵan adamdy qylmystyq qýdalaýǵa nemese berýshi tarapta jazanyń taǵaıyndalýyna ákep soqqan naq sol áreketteri úshin sot jaýaptylyǵyna tartýǵa jol berilmeıdi.
Qujatta sottalǵan adamdardyń tranzıti máselesi de qarastyrylyp otyr.
Zań jobasy Senattyń aldaǵy otyrysyna talqyǵa shyǵarylmaq.
