Qazaqstan men Úndistan arasyndaǵy reısterdiń nege toqtap qalǵany belgili boldy
ASTANA. QazAqparat - «Eır Astana» áýe kompanııasynyń Delı - Almaty baǵytyndaǵy 27 aqpanǵa josparlanǵan KC 908 reısi ýaqytynda ushyp shyǵa almaı otyr. Oǵan Pákistan Respýblıkasy áýe keńistiginiń búkil halyqaralyq áýe saparlaryna jabyqtyǵy sebep boldy, dep habarlaıdy QazAqparat tilshisi.
«Ushaq Delıden Almaty ýaqyty boıynsha saǵat 12:50 kezinde ushyp shyǵyp, saǵat 16:40 kezinde Almatyǵa kelýi kerek bolatyn. Qazirgi ýaqytta áýe kompanııasy atalǵan reıstiń jolaýshylaryn túsirip alý jóninde sheshim qabyldady», - delingen QR IIDM Azamattyq avıatsııa komıtetiniń habarlamasynda.
Belgili bolǵanyndaı, «Eır Astana» áýe kompanııasynyń 27 aqpanǵa josparlanǵan KC 963/964 reısi men 28 aqpanǵa josparlanǵan KC 907/908 reısi boljam boıynsha oryndalmaýy múmkin.
«Jolaýshylar atalǵan reıs jaıly koll-ortalyqtan nemese áýe kompanııasynyń resmı saıtynan bilip otyrǵany durys. «Eır Astana» áýe kompanııasynyń koll-ortalyqtary: Almaty boıynsha +7 7272 444477, Astana boıynsha +7 7172 584477, uıaly tel.: +7 702 702 4477», - delingen habarlamada.
Aıta keterligi, budan buryn 27 aqpan kúni ushyp shyqqan Uzbekistan Airways áýe kompanııasynyń Tashkent-Amrıtsar baǵytyndaǵy Boeing 767 borty Tashkentke qaıtyp kelgen bolatyn.
