Qazaqstan men Ulybrıtanııa strategııalyq seriktestikti nyǵaıtýǵa nıetti
Іssapardyń alǵashqy kúni Qazaqstan men Ulybrıtanııa arasyndaǵy strategııalyq dıalogtyń besinshi otyrysy ótti. Sharaǵa R.Vasılenko men Ulybrıtanııanyń Eýropa men Amerıka isteri jónindegi memlekettik mınıstri Alan Dankan teń tóraǵalyq etti. Otyrys konstrýktıvti negizde ótti. Aldymen halyqaralyq saıası arenadaǵy mańyzdy máselelerdi sholyp ótken taraptar ekijaqty qarym-qatynasty kópbaǵytty formatta egjeı-tegjeıli talqylady. Qazaqstan Prezıdenti Nursultan Nazarbaev pen Ulybrıtanııa Premer-mınıstri Tereza Meıdyń Brıýsseldegi ASEM sammıti aıasynda ótken kezdesýiniń ekijaqty qarym-qatynasqa jańa serpin bergeni atap ótildi.
Qazaqstan delegatsııasynyń basshysy ekijaqty qarym-qatynastyń jaǵymdy dınamıkasyn atap ótip, Strategııalyq dıalog, Saýda-ekonomıkalyq seriktestik boıynsha úkimetaralyq komıssııa, Іskerlik keńes sııaqty t.b. qurylymdardyń nátıjeli qyzmetine erekshe kóńil aýdardy.
Taraptar qazaqstan-brıtandyq strategııalyq seriktestikti odan ári nyǵaıtý perspektıvalaryn talqylady. Bul turǵyda BUU Qaýipsizdik Qeńesi, ekijaqty saýda-ekonomıkalyq, ınvestıtsııalyq jáne mádenı yntymaqtastyq, onyń ishinde Ulybrıtanııanyń Eýropalyq Odaqtan shyǵýyna baılanysty yntymaqtastyq, «Astana» halyqaralyq qarjylyq ortalyǵy (AHQO) sheńberindegi birlesken áreketterge, sondaı-aq Qazaqstanda aımaqtyń iri memleketteriniń qatysýymen úshjaqty ınvestıtsııalyq jobalardy iske asyrý múmkindigine basa nazar aýdaryldy.
Іssapar barysynda R. Vasılenko Qazaqstanmen seriktestik boıynsha jalpypartııalyq parlamenttik top jetekshisi Bob Stıýart bastaǵan Ulybrıtanııa Parlamenti depýtattarymen kezdesý ótkizdi. Taraptar jalpypartııalyq toptyń mamyr aıynda Qazaqstanǵa saparynyń nátıjelerin talqylady. Eske sala ketsek, atalǵan sapar barysynda brıtan Parlamenti ókilderi Parlament Májilisi, Syrtqy ister mınıstrigi, sondaı-aq elimizdiń túrli saıası partııalarynyń basshylyǵymen birqatar kezdesýler ótkizgen bolatyn. Kezdesý barysynda parlamentaralyq yntymaqtastyqty odan ári nyǵaıtý perspektıvalary men josparlary, onyń ishinde qazaqstandyq parlamentarıılerdiń Ulybrıtanııaǵa saparyn uıymdastyrý máselesi talqylandy.
Delegatsııa brıtandyq bıznes pen Brıtan-Qazaqstan qoǵamynyń (BQQ) ókilderimen kezdesý barysynda elimizdegi ınvestıtsııalyq klımatty odan ári jaqsartýǵa baǵyttalǵan reformalar men ınıtsıatıvalarmen tanystyrdy. Qazaqstannyń atalǵan saladaǵy jetistikteriniń bir dáleli retinde Búkilálemdik banktiń «Doing Business - 2019» reıtınginde byltyrǵy jylmen salystyrǵanda 8 orynǵa kóterilip, 190 memleket qatarynda 28-shi orynǵa ıe bolǵany sóz boldy.
R. Vasılenko brıtandyq kásipkerlerge eldegi aýqymdy jekeshelendirý baǵdarlamasy, AHQO qyzmeti, qytaılyq «Beldeý men jol» bastamasy aıasyndaǵy «Astana Hub» Halyqaralyq ІT startaptar parki týraly áńgimelep, suraqtaryna jaýap berdi.
Kezdesýge jıyrmaǵa jýyq kórnekti brıtandyq kásipkerler qatysty, olardyń qatarynda «Orion Group» kompanııasynyń aımaqtyq dırektory Mark Donnıson, «Central Asia Metals» kompanııasynyń tóraǵasy Nık Klark, «South China Securities» kompanııasynyń dırektory Hıýgo Djamms jáne basqalar boldy.
Sondaı-aq issapar sheńberinde «Chatham House» Koroldik halyqaralyq qatynastar ınstıtýtynyń basshylyǵymen de kezdesý ótti. Kezdesý barysynda qazaqstandyq dıplomat elimizdegi saıası, áleýmettik jáne ekonomıkalyq reformalarmen ári Qazaqstannyń syrtqy saıasattaǵy bastamalarymen tanystyryp ótti.
Sapar barysynda R. Vasılenko Halyqaralyq qatynastar jónindegi Eýrazııalyq keńestiń jyl saıynǵy besinshi otyrysyna qatysady.
