Qazaqstan men Ulybrıtanııa arasynda ózara quqyqtyq kómekter jasalady - Senat
ASTANA. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy bolyp ótti. Onda «Qazaqstan Respýblıkasy men Ulybrıtanııa jáne Soltústik Irlandııa Qurama Koroldigi arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» zań jobasy talqylandy.
Bas prokýrordyń birinshi orynbasary Iogan Merkeldiń aıtýynsha, atalmysh kelisimge byltyr 3 qarashada Memleket basshysynyń Ulybrıtanııaǵa sapary barysynda qol qoıylǵan. «Kelisim eki el arasyndaǵy qylmystyq ister boıynsha tergeý áreketteriniń barlyq kesheninde ózara quqyqtyq kómekterdi qarastyrady», - dedi Bas prokýror orynbasary.
Onyń aıtýynsha qujat, zattardy berýdi, qujattar tapsyrý máselelerin, qylmystyq jolmen alynǵan múlikterdi tárkileý men shekteýlerdi qarastyrady. Sonymen qatar, kelisim tárkilengen aktıvterdi bólý turǵysynan birqatar erekshelikterdi de qamtıdy. Máselen, ádette taraptar tárkilengen aktıvterdi teńdeı bóletin bolsa, bul kelisim shartta Qazaqstan tarapyna keıbir jaǵdaılarda mundaı aktıvterdi bólýdiń erekshe tártipteri qarastyrylady. Máselen, jymqyrylǵan memleket qarajattary bólýge jatpaıdy, sosyn tolyq kúıinde qaıtarylatyn bolady. Degenmen, onda aktıvterdi satýǵa arnalǵan shyǵystar eseptelmeıdi. I. Merkeldiń aıtýynsha, mundaı kelisimsharttar álemniń 22 elimen jasalǵan.
«Búginge deıin Qazaqstan dál osyndaı quqyqtyq kómekter boıynsha Ulybrıtanııa Úkimetine 9 márte ótinish jasady. Qazir Qazaqstan tarapynan dál osyndaı kelisimdi Frantsııa elimen, keıinnen Germanııamen jasaý baǵytynda saraptamalyq top qurylýda», - dedi I. Merkel.
Atalǵan qujat palatanyń jalpy otyrysyna shyǵarylatyn bolady.
