Qazaqstan men Ulybrıtanııa strategııalyq áriptestikti tereńdetip, ekijaqty saýdany keńeıtýdi ýaǵdalasty
ASTANA.KAZINFORM — Astana qalasynda Qazaqstan Respýblıkasy Syrtqy ister mınıstriniń orynbasary Álibek Qýantyrovtyń Ulybrıtanııanyń Shyǵys Eýropa jáne Ortalyq Azııa jónindegi saýda komıssary Devıd Rıdpen kezdesýi ótti. Bul týraly SІM málim etti.
Kezdesý barysynda qazaq-brıtan saýda-ekonomıkalyq jáne ınvestıtsııalyq áriptestigin odan ári nyǵaıtý perspektıvalary, sondaı-aq Saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komıssııanyń aldaǵy otyrysy kún tártibiniń basym baǵyttary talqylandy.
Ekijaqty saýdanyń oń serpini jáne ony odan ári arttyrýdyń aıtarlyqtaı áleýeti atap ótildi. Osy turǵyda Qazaqstan Ulybrıtanııanyń Ortalyq Azııadaǵy eń iri saýda áriptesi ekeni atap kórsetildi: Ulybrıtanııanyń óńir elderimen shamamen 5 mlrd fýnt sterlıng kólemindegi saýdasynyń 2,7 mlrd fýnt sterlıngke jýyǵy Qazaqstanǵa tıesili.
— Mańyzdy paıdaly qazbalar, energetıka, ınfraqurylym, kólik jáne logıstıka, qarjylyq qyzmetter, tsıfrlandyrý, jasandy ıntellekt jáne bilim berý salalaryndaǵy ınvestıtsııalyq ózara is-qımyldy damytýǵa erekshe nazar aýdaryldy. Qazaqstannyń strategııalyq ornalasýyn jáne Eýropa men Azııa arasyndaǵy ornyqty jetkizý tizbekterin qamtamasyz etýdegi rólin eskere otyryp, Transkaspıı halyqaralyq kólik baǵdaryn damytýdaǵy yntymaqtastyq áleýeti jeke atap ótildi, — delingen vedomstvonyń málimdemesinde.
Sonymen qatar Qazaqstandaǵy ınfraqurylymdyq, energetıkalyq jáne ónerkásiptik jobalardy iske asyrý úshin brıtandyq tájirıbe men qarjylyq quraldardy tartý múmkindikteri qarastyryldy. Osy turǵyda ratıfıkatsııalanǵan Strategııalyq áriptestik jáne yntymaqtastyq týraly kelisim naqty ózara tıimdi jobalardy ilgeriletýge, ınstıtýtsıonaldyq ózara is-qımyldy keńeıtýge jáne ekijaqty kún tártibiniń negizgi baǵyttary boıynsha ýaǵdalastyqtardy is júzinde iske asyrýǵa qolaıly negiz qalyptastyratyny atap ótildi.
— Kezdesý barysynda gýmanıtarlyq jáne bilim berý salalaryndaǵy baılanystardyń jandanýy, sonyń ishinde Qazaqstanda brıtandyq ýnıversıtetterdiń qatysýynyń keńeıýi atap ótildi. Bilim berý, kadrlar daıarlaý jáne ınnovatsııalyq ekojúıeni damytý uzaq merzimdi ekonomıkalyq áriptestiktiń mańyzdy elementteri retinde belgilendi, — dep habarlady mınıstrlikten.
Kezdesý qorytyndysy boıynsha qazaq-brıtan strategııalyq áriptestigin odan ári tereńdetýge, ózara saýdany keńeıtýge jáne qol jetkizilgen ýaǵdalastyqtardy is júzinde iske asyrýǵa daıyndyq rastaldy.
Aıta keteıik, Qazaqstan men Lıýksembýrg avıatsııa jáne logıstıka salasyndaǵy yntymaqtastyqty keńeıtpek.
