Qazaqstan men Ulybrıtanııa sırek metaldar salasynda ózara tıimdi áriptestik ornatýǵa nıetti
ASTANA. KAZINFORM - Ónerkásip jáne qurylys mınıstri Ersaıyn Naǵaspaev Ulybrıtanııanyń Qazaqstan Respýblıkasyndaǵy Tótenshe jáne ókiletti elshisi Sallı Aksýorsımen kezdesý ótkizdi, dep habarlaıdy Ónerkásip jáne qurylys mınıstrliginiń baspasóz qyzmeti.
Kezdesý barysynda taraptar taý-ken-metallýrgııa kesheni men geologııalyq barlaý, sondaı-aq asa mańyzdy shıkizat resýrstary jáne ónerkásiptik kooperatsııa salasyndaǵy ekijaqty yntymaqtastyqtyń qazirgi ahýaly men damý perspektıvalaryn talqylady.
Mınıstr Ulybrıtanııa elimizdiń saýda-ekonomıkalyq jáne ınvestıtsııalyq eń iri seriktesteriniń biri ekenin atap ótti.
-Qazaqstan bıznesti júrgizý úshin qolaıly jaǵdaılar usynady jáne brıtanııalyq kompanııalardyń qatysýyn keńeıtý úshin senimdi alań bola alady. Brıtanııalyq tehnologııalarǵa, kapıtalǵa jáne saraptamalarǵa júginý, olardy tartý elimizdiń turaqty áleýmettik-ekonomıkalyq damýyna oń yqpal etedi, – dedi Ersaıyn Naǵaspaev.
Mınıstr Ulybrıtanııanyń jetekshi ýnıversıtetterimen, sonyń ishinde Cardiff University jáne University of Birmingham-men yntymaqtastyqty damytýǵa, bul rette ónerkásiptiń naqty qajettilikterine baǵyttalǵan mamandardy daıarlaý úshin tájirıbege baǵyttalǵan oqytý men ǵylymdy óndirispen yqpaldastyrýǵa basa nazar aýdardy.
Sonymen qatar ol jumys istep turǵan óndiristerde taǵylymdamalardan ótý, dýaldy oqytýdy engizý jáne asa mańyzdy mıneraldardy óńdeý salasyndaǵy jobalar úshin kadrlar daıarlaý baǵyttary boıynsha ózara is-qımyldy ilgeriletý qajettigin atap ótti.
Sondaı-aq Ersaıyn Naǵaspaev elshi Sallı Aksýorsıdi 2026 jyldyń 2-3 sáýirinde ótetin «Geoscience & Exploration Central Asia» halyqaralyq geologııalyq forýmyna qatysýǵa shaqyrdy.
Kezdesý qorytyndysy boıynsha taraptar sırek jáne sırek jer metaldary salasynda ózara tıimdi jáne uzaq merzimdi áriptestik ornatýǵa nıetti ekenderin rastady.
Osyǵan deıin Qazaqstannyń sırek metall óndirisiniń 4 baǵytyna basymdyq beretini týraly jazdyq.
