Qazaqstan men Ulybrıtanııa paıdaly qazbalardy birlesip óndirmek
Qazaqstandaǵy sırek kezdesetin jer elementterin ıgerý úshin Brıtan tehnologııalary tartylatyn bolady. Londonda mańyzdy mıneraldar salasynda yntymaqtastyqty nyǵaıtý jónindegi Jol kartasyna qol qoıyldy. Aldaǵy ýaqytta Qazaqstan Ulybrıtanııamen birlesip, geologııalyq barlaý, paıdaly qazbalardy óndirý jáne óńdeý jumystaryn júrgizbek, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Memleket basshysy Qazaqstannyń sırek jer metaldaryn «Jańa munaı» dep atap, olardy ıgerýdi úkimetke tapsyrǵan bolatyn. Mańyzdy mindetti júzege asyrý úshin jańa tehnologııalar qajet. Osy maqsatpen Londonǵa Qazaqstan Respýblıkasynyń Ónerkásip jáne qurylys vıtse-mınıstri kelip, Ulybrıtanııanyń Bıznes jáne saýda isteri jónindegi memlekettik mınıstrimen kezdesti.
«Qazaqstan boıynsha aıtsaq qazir bizde sırek jer elementteri óte kóp. 18 elemetimiz bar. Onyń ishinde segizin óńdeý máselesin pysyqtadyq. Qazir jumys istelýde. Taǵy 10 elementimiz bar. Tehnologııalar joq, biraq paıdaly qazbalar bar. Ol úshin tehnologııalar kerek», — deıdi QR Ónerkásip jáne qurylys vıtse-mınıstri Sharhan Iran.
Bir jyl buryn Ulybrıtanııanyń Syrtqy ister mınıstri Djeıms Kleverlı Qazaqstanǵa issaparmen kelip, mańyzdy mıneraldar salasyndaǵy yntymaqtastyq týraly Memorandýmǵa qol qoıǵany belgili. Búgingi Jol kartasy sol kelisimniń zańdy jalǵasy.
«Jol kartasynda qaı salada seriktestik ornatylatyny naqty jazylǵan. Bul jerde másele ózara tıimdi yntymaqtastyq týraly ekenin túsiný kerek. Brıtanııalyqtar resýrstyq bazamyzǵa qol jetkizýge múddeli bolsa, bizdiń úkimet olardyń tehnologııalarynyń transferti týraly naqty talaptar qoıyp jatyr», — deıdi Qazaqstannyń Ulybrıtanııadaǵy elshisi Maǵjan Іlııasov.
Qujatta elimizge jańa tehnologııalar tartýmen qatar mańyzdy mıneraldar tizbegin dekarbonızatsııalaý, sondaı-aq ǵylymı-zertteý áleýetimizdi damytý máseleleri qamtylǵan.
«Bul ózara túsinistik týraly memorandýmdy ilgeri jyljytýǵa baǵyttalǵan batyl qadam. Jol kartasynyń nátıjesinde Qazaqstanda brıtanııalyq kompanııalar kókjıekterin keńeıtip, tájirıbelerimen bólisedi degen zor úmittemiz», — deıdi Ulybrıtanııanyń Ónerkásip jáne ekonomıkalyq qaýipsizdik mınıstri Nýsrat Ganı.
Búginde brıtanııalyq Maritime House kompanııasy qazaqstandyq «Jezqazǵansırekmetall» kásipornymen birlese otyryp, renıı elementin óndirýdi bastap ketti. Rolls-Royce kompanııasymen seriktestik ornatý týraly kelissózder júrgizilýde. Sondaı-aq elimizdiń Ulttyq geologııalyq qyzmeti Brıtan geologııalyq barlaý qyzmetimen birlesip jumys isteýdi josparlap otyr.
