Qazaqstan men Ulybrıtanııa kelisimi qaı salalarda yntymaqtastyqty arttyrady
ASTANA. KAZINFORM — Májilis Qazaqstan men Ulybrıtanııa jáne Soltústik Irlandııa Qurama Koroldigi arasyndaǵy strategııalyq áriptestik pen yntymaqtastyq týraly kelisimdi ratıfıkatsııalady.
Bul qujat 2024 jyly 24 sáýirde Astanada jasalǵan. Ol Ulybrıtanııanyń 2020 jyldyń basynda Eýropalyq Odaqtan shyǵýyna baılanysty jasalǵan edi.
— Qazaqstan men Ulybrıtanııa arasyndaǵy yntymaqtastyq sońǵy jyldary jańa serpin alyp, saıası dıalogty keńeıtý, saýda ekonomıkalyq baılanystardy damytý jáne ınvestıtsııalyq yntymaqtastyqty tereńdetý qajettigi aıqyn baıqaldy. Atalǵan kelisim Qazaqstan men EO arasyndaǵy keńeıtilgen áriptestik jáne yntymaqtastyq týraly kelisim erejeleri eskerile otyryp, ázirlengenin atap ótken jón, — dedi QR Syrtqy ister mınıstri Ermek Kósherbaev Májilistiń jalpy otyrysynda.
Mınıstrdiń aıtýynsha, eki el arasyndaǵy saýda-ekonomıkalyq jáne ınvestıtsııalyq yntymaqtastyq turaqty damyp keledi. Oń ózgerister sońǵy jyldary ekijaqty taýar aınalymy qarqynynan aıqyn baıqalady.
2025 jyldyń qorytyndysy boıynsha, ózara saýda kólemi 1,6 mlrd AQSh dollaryn quraǵan. Sonymen birge, Ulybrıtanııa Qazaqstan ekonomıkasyna 23 mlrd dollar kóleminde ınvestıtsııa salǵan.
Atalǵan kelisim aıasynda energetıka salasyndaǵy áriptestikti keńeıtýge de erekshe nazar aýdaryldy. Bul baǵytta dástúrli energetıkamen qatar jańartylatyn energııa kózderin damytý, energııa tıimdiligin arttyrý jáne jańa tehnologııalardy engizý máseleleri qarastyrylǵan.
— Qujat kólik, logıstıka, tsıfrlyq tehnologııalar jáne ınnovatsııa salalaryndaǵy ózara is qımyldy damytýǵa jaǵdaı jasaıdy. Bul Qazaqstannyń halyqaralyq kólik dálizderindegi rólin nyǵaıtýǵa jáne jańa óndiristerdi damytýǵa yqpal etedi. Kelisimniń mańyzdy baǵyttarynyń biri — ekologııa jáne klımattyń ózgerýi máseleleri boıynsha yntymaqtastyqty keńeıtý. Bul baǵytta tabıǵı resýrstardy tıimdi paıdalaný, qorshaǵan ortany qorǵaý jáne klımattyq bastamalardy iske asyrý boıynsha tájirıbe almasý josparlanýda, — dedi Syrtqy ister mınıstri.
Budan bólek, bilim, ǵylym, mádenıet jáne ınnovatsııalar salalaryndaǵy baılanystardy nyǵaıtýǵa erekshe kóńil bólindi. Bul jastar arasyndaǵy almasý baǵdarlamalaryn, ǵylymı zertteýlerdi jáne akademııalyq yntymaqtastyqty keńeıtýge múmkindik beredi.
Buǵan deıin Ermek Kósherbaev Eýropaǵa vıza rejımin jeńildetý boıynsha kelissózde negizgi jumystar pysyqtalyp bolǵanyn aıtty.
