Qazaqstan men Ulybrıtanııa yntymaqtastyqty jan-jaqty nyǵaıtý máselesin talqylady
ASTANA. KAZINFORM — QR Syrtqy ister mınıstriniń orynbasary Arman Isetov Ulybrıtanııa jáne Soltústik Irlandııa Birikken Koroldiginiń Qazaqstandaǵy Elshisi Sallı Aksýorsımen kezdesý ótkizdi. Bul týraly mınıstrliktiń resmı saıty jarııalady.
Taraptar qazaq-brıtan qatynastarynyń qazirgi ahýaly men keleshegin, sondaı-aq saýda-ekonomıkalyq salada josparlanǵan is-sharalardy talqylady.
Suhbat barysynda bilim, energetıka, kólik, jasandy ıntellekt jáne tsıfrlyq tehnologııalar, ornyqty damý jáne klımat kún tártibi salalaryndaǵy yntymaqtastyqty keńeıtý múmkindikterine erekshe nazar aýdaryldy.
Kezdesý qorytyndysy boıynsha taraptar ekijaqty jáne kópjaqty ózara is-qımyldyń joǵary qarqynyn qoldaýǵa ózara múddelilik bildirdi.
Aıta keteıik, QR Premer-mınıstriniń birinshi orynbasary Roman Sklıar GFR Ekonomıka jáne energetıka mınıstrimen saýda-ekonomıkalyq yntymaqtastyqty keńeıtý máselelerin talqylady.