Qazaqstan men Ulybrıtanııa ǵalymdary qola dáýirindegi tehnologııalyq jańashyldyqtardy zertteıdi
ASTANA.KAZINFORM - Búgin Londonda Bett Show UK 2026 bilim berý tehnologııalarynyń halyqaralyq kórmesi aıasynda D.Serikbaev atyndaǵy Shyǵys Qazaqstan tehnıkalyq ýnıversıteti men London ýnıversıtettik kolledjiniń (UCL) Arheologııa ınstıtýty arasynda ózara túsinistik týraly memorandýmǵa qol qoıyldy. Bul týraly Ǵylym jáne joǵary bilim mınıstrligi habarlady.
UCL Arheologııa ınstıtýty – arheometallýrgııa jáne pánaralyq zertteýler salasyndaǵy álemdegi jetekshi ǵylymı ortalyqtardyń biri.
Memorandýmǵa ShQTÝ rektory Sáýle Rahmetýllına men UCL Arheologııa ınstıtýtynyń dırektory Kevın Makdonald qol qoıdy.
Kelisim eki iri ǵylymı jobanyń aıasynda uzaq merzimdi ǵylymı yntymaqtastyqty damytýǵa baǵyttalǵan. Atap aıtqanda, Eýropalyq zertteý keńesi (European Research Council, ERC) qoldaıtyn jáne UCL bazasynda Mılana Radıvoevıchtiń jetekshiligimen júzege asyrylyp jatqan halyqaralyq DREAM jobasy, sondaı-aq QR Ǵylym jáne joǵary bilim mınıstrligi Ǵylym komıtetiniń qoldaýymen ShQTÝ-da Evgenıı Vodıasovtyń jetekshiligimen oryndalyp jatqan «Kóne Eýrazııalyq metallýrgııa júıesindegi Shyǵys Qazaqstannyń qola ken oryndary» atty qazaqstandyq joba.
Atalǵan eki jobany Eýrazııadaǵy kóne metallýrgııanyń damýyna qosqan úlesin, transóńirlik saýda jelileriniń qalyptasýyn jáne qola dáýirindegi tehnologııalyq jańashyldyqtardy keshendi túrde zertteý maqsaty biriktiredi.
Qol qoıylǵan memorandým birlesken dalalyq jáne zerthanalyq zertteýler júrgizýdi, halyqaralyq ǵylymı jarııalanymdar daıyndaýdy, tájirıbe almasýdy jáne ǵylymı is-sharalar uıymdastyrýdy kózdeıdi. Seriktestik aıasynda álemdik arheologııadaǵy eń qarqyndy damyp kele jatqan ǵylymı baǵyttardyń biri sanalatyn arheometallýrgııany damytýǵa erekshe nazar aýdarylady.
QR Ǵylym jáne joǵary bilim mınıstrligi bul kelisimdi halyqaralyq ǵylymı áriptestikti nyǵaıtýǵa jáne qazaqstandyq zertteýlerdi jahandyq ǵylymı keńistikke ıntegratsııalaýǵa baǵyttalǵan mańyzdy qadam retinde qarastyrady.
Aıta keteıik, qazaqstandyq ǵalymdar úshin University of Nottingham-pen jańa ǵylymı múmkindikter ashylady.