Qazaqstan men Ulybrıtanııa aýyl sharýashylyǵy salasyndaǵy yntymaqtastyqty nyǵaıtpaq
ASTANA. KAZINFORM – Aýyl sharýashylyǵy salasyndaǵy yntymaqtastyqtyń ózekti máselelerin mınıstr Aıdarbek Saparov Ulybrıtanııanyń Qazaqstandaǵy Elshisi Ketı Lıchpen kezdesýde talqylady. Bul týraly vedomstvonyń baspasóz qyzmeti málim etti.
Mınıstr AÓK salasyndaǵy ekijaqty yntymaqtastyqty damytýdyń jáne elder arasyndaǵy taýar aınalymynyń kólemin ulǵaıtýdyń mańyzdylyǵyn atap ótti.
«Biz aýyl sharýashylyǵy ónimderin, atap aıtqanda dándi daqyldardy, kondıterlik jáne un ónimderin, et jáne et ónimderin, ósimdik maıyn jáne t. b. jetkizýdi ulǵaıtýǵa múddelimiz, elderimiz arasyndaǵy saýdany ulǵaıtý, onyń qurylymyn jaqsartý, jetkiziletin taýarlar nomenklatýrasyn keńeıtý jónindegi jumysty jandandyrýdy usynamyz», — dep atap ótti Aıdarbek Saparov.
Taraptar Ulybrıtanııaǵa sút jáne et ónimderin, onyń ishinde jylqy ónimderin jetkizýge qoıylatyn veterınarııalyq-sanıtarııalyq talaptardy kelisý máselelerin talqylady.
«Qazaqstannyń agrarlyq sektorda úlken tájirıbesi bar ekenin eskere otyryp, biz sizdermen yntymaqtastyqty tereńdetip, AÓK ónimderiniń taýar aınalymyn arttyrý boıynsha birlesip jumys istegimiz keledi. Aǵymdaǵy jyly dándi daqyldardyń mol ónimin kútýdesizder, mal sharýashylyǵy da damýda. Osy rette, bizde kóptegen yntymaqtastyq úshin sebepter bar», — dedi Ketı Lıch óz kezeginde.
Qazaqstandyq tarap sonymen qatar agrarlyq ǵylym salasynda, atap aıtqanda qoı jáne jylqy sharýashylyǵynda selektsııalyq-genetıkalyq jumys, tehnologııalar transferti jáne mamandardyń biliktiligin arttyrý salasynda yntymaqtastyq ornatýdy usyndy.
Sonymen qatar, aýyl sharýashylyǵy tehnıkasyn óndirý, aýyl sharýashylyǵy ónimderin qaıta óńdeý boıynsha birlesken kásiporyndar qurý boıynsha ınvestıtsııalyq yntymaqtastyqty jandandyrý nıeti bar.
Kezdesý qorytyndysy boıynsha Jol kartasyna qol qoıý týraly ýaǵdalastyqqa qol jetkizildi, ol ınvestıtsııalyq jobalardy iske asyrýdyń naqty merzimderin, kezeńderin jáne aýyl sharýashylyǵy salasyndaǵy elder arasyndaǵy taýar aınalymyn ulǵaıtý jónindegi sharalardy aıqyndaıdy.
