Qazaqstan men Ulybrıtanııa atom energııasyn beıbit maqsatta paıdalaný máselelerin talqylady
ASTANA. KAZINFORM — QR Atom energııasy jónindegi agenttiginiń tóraǵasy Almasadam Sátqalıev Qazaqstandaǵy Ulybrıtanııa jáne Soltústik Irlandııa Birikken Koroldiginiń elshisi Sallı Aksýorsı hanymmen kezdesý ótkizdi, dep habarlaıdy vedomstvonyń baspasóz qyzmeti.
Kezdesý barysynda atom energııasyn beıbit maqsatta paıdalaný salasyndaǵy ekijaqty yntymaqtastyqtyń ózekti máseleleri men damý perspektıvalary, sondaı-aq ǵylymı zertteýler, kadrlar daıarlaý jáne normatıvtik-quqyqtyq bazany damytý baǵyttaryndaǵy ózara is-qımyl talqylandy.
— Qazaqstan Respýblıkasynda atom energetıkasyn damytý eldiń uzaq merzimdi energetıkalyq qaýipsizdigin qamtamasyz etýdiń jáne ornyqty áleýmettik-ekonomıkalyq damýdyń negizgi elementteriniń biri retinde qarastyrylatyny atap ótildi. Atom energııasyn beıbit maqsatta paıdalaný salasyndaǵy Qazaqstan Respýblıkasynyń normatıvtik-quqyqtyq bazasyn qalyptastyrý kezinde halyqaralyq usynymdar men standarttardyń eskeriletini kórsetildi. Halyqaralyq ıadrolyq jáne radıatsııalyq qaýipsizdik talaptaryn eskere otyryp, shaǵyn modýldik reaktorlardy qosa alǵanda, zamanaýı atomdyq tehnologııalardy engizý máselelerine erekshe nazar aýdaryldy, — delingen habarlamada.
Taraptar sondaı-aq retteý salasyndaǵy yntymaqtastyqty keńeıtý, saraptamamen almasý jáne mamandardyń biliktiligin arttyrý múmkindikterin, onyń ishinde akademııalyq jáne bilim berý baǵdarlamalary aıasyndaǵy ózara is-qımyldy talqylady.
Kezdesý qorytyndysy boıynsha taraptar transparenttilik, halyqaralyq mindettemelerdi saqtaý jáne ózara senim qaǵıdattaryna negizdelgen konstrýktıvti dıalogty odan ári damytýǵa jáne yntymaqtastyqty nyǵaıtýǵa ózara múddelilikti rastady.
Budan buryn Atom energııasy jónindegi agenttiginiń ǵylymı-tehnıkalyq keńesi jumysyn bastaǵany aıtyldy.