Qazaqstan men Ulybrıtanııa arasyndaǵy taýar aınalymy 1,63 mlrd dollarǵa jetti
ASTANA. KAZINFORM- Qazaqstan men Ulybrıtanııa arasyndaǵy taýar aınalymy 2025 jyldyń qorytyndysy boıynsha 1,63 mlrd AQSh dollaryn qurap, 2024 jylmen salystyrǵanda 83,7%-ǵa ósti. 2026 jyldyń qańtar–shilde aılarynda bul kórsetkish 1,25 mlrd dollarǵa jetip, 2025 jyldyń sáıkes kezeńimen salystyrǵanda 68,5%-ǵa artty.
Bul týraly Qazaqstan Respýblıkasy Saýda jáne ıntegratsııa mınıstri Arman Shaqqalıevtiń Ulybrıtanııa Úkimetiniń Ázerbaıjan jáne Ortalyq Azııa elderi boıynsha saýda ókili Lord Djon Alderdaıspen kezdesýinen málim boldy.
Taraptar ekijaqty saýda dınamıkasyn, Qazaqstan eksportynyń kólemin arttyrýdy, óndiristik kooperatsııany, ınvestıtsııalyq jáne ǵylymı-bilim berý salalaryndaǵy yntymaqtastyqty talqylady.
Qazaqstan saýda kóleminiń ósý qarqynyn saqtap qana qoımaı, onyń qurylymyn ártaraptandyrýǵa jáne qosylǵan quny joǵary ónimderdiń eksportyn arttyrýǵa múddeli. Qazirgi tańda eksporttyń negizgi bóligin kúmis, shıki munaı, mys jáne mys katodtary quraıdy.
-Biz úshin eki el arasynda saýda baılanystaryn odan ári tereńdetip, ártaraptandyra otyryp jalǵastyrý mańyzdy. Eń aldymen, Qazaqstannyń shıkizattyq emes ónimderin brıtan naryǵyna shyǵarýdy keńeıtýge múddelimiz, – dedi Arman Shaqqalıev.
Osyǵan baılanysty mınıstr brıtandyq ımporttaýshylar men saýda jelileriniń ókilderinen quralǵan saýda-ekonomıkalyq mıssııany Qazaqstanda uıymdastyryp, olardy otandyq óndirýshilermen tikeleı baılanystyrýdy usyndy. Sondaı-aq kezdesýde brıtan naryǵynda eksporttyq ónimderge qoıylatyn sapa, sertıfıkattaý, qaptama jáne standart talaptary talqylandy.
Kezdesýde mańyzdy mıneraldar jáne olardy qaıta óńdeýdi damytý máselesine de erekshe nazar aýdaryldy. Lord Djon Alderdaıs brıtandyq kompanııalar men ýnıversıtetterdiń Qazaqstanmen yntymaqtastyǵy mıneraldardy óndirýmen ǵana shektelmeı, olardy qaıta óńdeý jáne qosylǵan quny joǵary ónim shyǵarý baǵyttaryn da qamtýy múmkin ekenin atap ótti.
- Qazaqstannyń tabıǵı resýrstary mol. Alaıda bul resýrstardy tek óndirýmen shektelmeı, qosylǵan qun qalyptastyrý jáne qaıta óńdeýdi damytý mindetin qoıyp otyrǵanyńyz mańyzdy. Biz yntymaqtastyq úshin úlken múmkindikterdi dál osy baǵyttan kórip otyrmyz, – dedi Lord Djon Alderdaıs.
Taraptar sondaı-aq óńdeý ónerkásibine, energetıkaǵa, logıstıkaǵa jáne joǵary tehnologııalyq salalarǵa brıtan ınvestıtsııalaryn tartý, sondaı-aq eki el kompanııalary arasyndaǵy tikeleı baılanysty keńeıtý múmkindikterin qarastyrdy.
Kezdesý barysynda standarttaý, eksportty ilgeriletý, ǵylym jáne bilim berý salalaryndaǵy yntymaqtastyq máseleleri de talqylandy. Qazaqstan Brıtandyq eksport jáne halyqaralyq saýda ınstıtýtymen tájirıbe almasýǵa, sondaı-aq «QazStandart» pen Brıtan standarttar ınstıtýty (BSI) arasyndaǵy ózara is-qımyldy odan ári damytýǵa múddeli.
Sonymen qatar qazaqstandyq eksporttaýshylardy kómirtekti retteý talaptaryna, onyń ishinde CBAM talaptaryna daıyndaý máseleleri qaraldy.
Lord Djon Alderdaıs eki eldiń ýnıversıtetteri men ǵylymı ortalyqtary arasynda, onyń ishinde taý-ken ónerkásibi, mıneraldardy qaıta óńdeý jáne atom salalarynda yntymaqtastyq ornatýdyń áleýeti joǵary ekenin atap ótti.
Kezdesý sońynda taraptar jalpy áleýetten naqty saýda, ınvestıtsııalyq, óndiristik jáne ǵylymı jobalarǵa kóshýge, sondaı-aq Qazaqstan men Ulybrıtanııanyń bıznesi men beıindi uıymdary arasyndaǵy tikeleı baılanysty odan ári damytýǵa múddeli ekenin rastady.
Osyǵan deıni Qazaqstan men Italııa arasyndaǵy saýda kólemi 16,9 mlrd dollarǵa jetkeni týraly jazdyq.
