Qazaqstan men Ulybrıtanııa arasyndaǵy strategııalyq seriktestik jol kartasy bekitildi
ASTANA. KAZINFORM — Londonǵa jumys sapary aıasynda Qazaqstan Respýblıkasynyń Syrtqy ister mınıstri Ermek Kósherbaev brıtan bıznes-qoǵamdastyǵy ókilderimen dóńgelek ústelge qatysty, dep habarlaıdy mınıstrliktiń baspasóz qyzmeti.
Brıtan tarapynan is-sharaǵa Bıznes jáne saýda jónindegi mınıstriniń mindetin atqarýshy, Qazaqstan-Ulybrıtanııa Saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komıssııasynyń brıtandyq bóliginiń teń tóraǵasy Krıs Braıant, Brıtan-qazaq qoǵamdastyǵynyń tóraǵasy Rýpert Gýdman, sondaı-aq birqatar brıtandyq «Maritime House», «Weir Group», «Perry Engineering», «Car Park Transformer», «British Petroleum», «Standard Chartered Bank», «UK Export Finance», «London Stock Exchange Group», «Gleeds», «Better Earth», «Eutelsat OneWeb» kompanııalarynyń basshylyǵy men «Coventry University» men «Cardiff University» ókilderi qatysty.
Qatysýshylar Qazaqstan men Ulybrıtanııa arasyndaǵy saýda-ekonomıkalyq jáne ınvestıtsııalyq seriktestikti keńeıtý perspektıvalaryn talqylady. Mańyzdy mıneraldar men sırek jer metaldary salasyndaǵy yntymaqtastyqqa erekshe nazar aýdaryldy.
— Júrgizilip jatqan ınstıtýtsıonaldyq reformalar aıasynda Qazaqstan ınvestorlardy qorǵaýdy odan ári nyǵaıtyp, nysanaly salyqtyq jeńildikter men preferentsııalar usynýdy jalǵastyrady. Biz burynǵydaı ınvestıtsııalaryńyzdyń uzaq merzimdi qaıtarymyn qamtamasyz etýge berik beıildimiz. Buǵan saıası turaqtylyq, qolaıly bıznes-orta jáne ekonomıkamyzda jańa múmkindikter ashýǵa baǵyttalǵan turaqty kúsh-jigerimiz járdemdesedi, — dedi Ermek Kósherbaev.
Qazaq dıplomaty Ulybrıtanııanyń bıznes-qoǵamdastyǵy ókilderin Qazaqstannyń sońǵy 25 jyldaǵy jetistikteri týraly habardar etti.
— Qazaqstan aıtarlyqtaı ekonomıkalyq ósimge qol jetkizdi, onyń ortasha naqty jyldyq kórsetkishi 5,7%-dy quraıdy. Halyqaralyq valıýta qorynyń sońǵy derekterine sáıkes elimizdiń nomınaldy jalpy ishki ónimi 300 mlrd AQSh dollarynan asady, bul bizdi álemdegi eń iri 50 ekonomıkanyń qataryna qosady. Qazirgi ýaqytta Ortalyq Azııaǵa tartylatyn tikeleı sheteldik ınvestıtsııalardyń 60%-dan astamy Qazaqstanǵa tıesili, bul elimizdiń óńirdiń ekonomıkalyq ortalyǵy retindegi pozıtsııasyn nyǵaıtady, — dedi Kósherbaev.
Óz kezeginde K.Braıant Qazaqstandaǵy brıtan ınvestorlarynyń jetistikterin jáne ekijaqty yntymaqtastyqtyń mańyzyn atap ótti. Ol jasyl ekonomıka, sırek jer metaldary, kólik jáne tranzıt, bilim berý jáne jasandy ıntellekt salalarynda birlesken jumysqa daıyn ekenin bildirdi. Ol bul jobalardyń ornyqty ınvestıtsııalyq múmkindikter qalyptastyryp, uzaq merzimdi áriptestikti nyǵaıtatynyn jáne mańyzdy materıaldardyń halyqaralyq naryqtarǵa jetkizilim tizbekterin ártaraptandyrýǵa yqpal etetinin atap ótti.
Forým qatysýshylary ekonomıkalyq yntymaqtastyqty kúsheıtý óńirdiń ornyqty damýyna jáne jetkizilim tizbekterin ártaraptandyrýǵa yqpal etetinimen kelisti. Sondaı-aq olar qazaq-brıtan seriktestigin dıalog deńgeıinen Qazaqstan ekonomıkasynyń jańa basym baǵyttarynda naqty jobalardy iske asyrý kezeńine kóshirýdiń mańyzdylyǵyn atap ótti.
Іs-shara qorytyndysy boıynsha mynandaı qujattarǵa qol qoıyldy:
— 2027 jylǵa deıingi Qazaqstan-Ulybrıtanııa arasyndaǵy mańyzdy mıneraldar salasyndaǵy strategııalyq seriktestiktiń jol kartasy;
— «Coventry University» men «Coventry University Kazakhstan» arasyndaǵy seriktestikti keńeıtý jáne Almaty qalasynda lıtsenzııalyq kampýs ashý týraly memorandým.
Budan bólek, Qazaqstandaǵy brıtandyq bilim berý mekemeleriniń qatysýyn keńeıtý, onyń ishinde Almaty qalasynda «Charterhouse School» mektebin ashý, «Cardiff University» jasandy ıntellekt ortalyǵyn iske qosý, sondaı-aq Aqtóbe qalasynda «Heriot-Watt University» jańa kampýsyn ashý týraly málimet jarııalandy.
Ulybrıtanııa Qazaqstan ekonomıkasyndaǵy on iri ınvestordyń qataryna kiredi. 2024 jyldyń qorytyndysy boıynsha brıtan ınvestıtsııalarynyń kólemi 723,7 mln AQSh dollardy qurady, al 2025 jyldyń alǵashqy toǵyz aıynda bul kórsetkish 471,5 mln AQSh dollaryna jetti.
Budan buryn 26 aqpanda London qalasynda syrtqy ister mınıstrleri deńgeıinde «Ortalyq Azııa — Ulybrıtanııa» (CA5+1) formatyndaǵy kezdesý ótetinin jazǵan edik. Kelissózder seriktestikti tereńdetip, naqty bastamalardy iske qosýǵa serpin bermek.