Qazaqstan men Ýkraına polıtseıleri birlesken tergeý toptaryn qurady

NUR-SULTAN. QazAqparat – QR Parlamenti Senatynyń jalpy otyrysynda «Qazaqstan men Ýkraına arasyndaǵy qylmystyq ister boıynsha quqyqtyq kómek týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Shartqa 2018 jyldyń 29 qazanynda qol qoıylǵan.

«Jalpy, qazir eki el arasyndaǵy qylmystyq ister boıynsha quqyqtyq kómek 1993 jylǵy Mınsk konventsııasyna sáıkes júzege asyrylady. Alaıda atalǵan konventsııaǵa qol qoıylǵan ýaqyttan beri zańnama men sot-tergeý tájirıbesi ózgerdi. Ýkraınada kóptegen ózgerister bar.

Konventsııa men usynylyp otyrǵan shart arasynda eshqandaı qaıshylyq joq. Kerisinshe olar bir-birin tolyqtyrady, biraz normany naqtylaıdy», - dedi QR Bas prokýrordyń orynbasary Marat Ahmetjanov.

Onyń sózine qaraǵanda, shart kúdikti men aıyptynyń kinásin dáleldeýge baǵyttalǵan keshendi protsessýldyq áreketterdi júrgizýdi qarastyrady.

«Qujat eki eldiń quzyrly organdaryna kúdikti men aıyptalýshynyń kinásin dáleldeý boıynsha keshendi tergeý jasaýǵa quqyq beredi.

Mundaı ekijaqty shart 27 elmen bar. Bul kelisimniń birqatar ereksheligin aıtar bolsaq, aldymen qujat quqyq qorǵaý organdarynyń ýkraınalyq áriptestermen tikeleı baılanys jasaýǵa múmkindik beredi. Bul eki jaq úshin de mańyzdy norma jáne qylmyspen kúres baǵytynda ózara senimdi bildiredi. Odan basqa tergeý jumysynyń jedeldigin arttyrady. Taǵy bir erekshelik, shart boıynsha qajet jaǵdaıda birlesken tergeý toptaryn qurýǵa bolady», - dedi ol.

«Shartty ratıfıkatsııalaý ekonomıkalyq-áleýmettik jáne saıası keri áser etpeıdi. Ony iske asyrý bıýdjetten qosymsha qarjy talap etpeıdi», - dedi Marat Ahmetjanov.

Senat depýtattary atalǵan qujatty talqylaýdan keıin qabyldady.