Qazaqstan men Ýkraına arasyndaǵy taýar aınalymy 5,4% ósti
ASTANA. KAZINFORM – Qazaqstan Premer-mınıstriniń orynbasary – Ulttyq ekonomıka mınıstri Serik Jumanǵarın Ýkraına Syrtqy ister mınıstriniń orynbasary Aleksandr Mışenkomen kezdesti. Bul týraly Úkimettiń baspasóz qyzmeti habarlady.
Taraptar saýda-ekonomıkalyq yntymaqtastyqty damytý perspektıvasyn, sondaı-aq Saýda-ekonomıkalyq yntymaqtastyq jónindegi memleketaralyq komıssııanyń qyzmetin qaıta bastaý múmkindigin talqylady.
Eki el arasyndaǵy negizgi ózara is-qımyl baǵytynyń biri agroónerkásip kesheni bolyp qala beredi. Kezdesýde Qazaqstannyń birneshe óńirindegi sút sharýashylyqtarynyń birneshe jyldan beri Ýkraına sút óndirýshileri qaýymdastyǵymen asyltuqymdy sútti maldy jetkizý, taýarly sút fermalaryn basqarý salasyndaǵy qazaqstandyq mamandardyń biliktiligin arttyrý jónindegi yntymaqtastyǵy atalyp ótti.
2025 jyldyń qorytyndysy boıynsha Qazaqstan men Ýkraına arasyndaǵy taýar aınalymy $415,8 mln-ǵa jetti. Bul 2024 jylmen salystyrǵanda 5,4%-ǵa artyq ($394,3 mln). Qazaqstannan Ýkraınaǵa eksport negizinen ferroqorytpa, tyńaıtqysh, kúrish jáne basqa da taýarlardan turady. Al ımport boıynsha shokolad jáne quramynda kakao bar basqa da ónimder, un jáne kondıterlik ónimder, dárilik zattar, súzbe men irimshikter jáne taǵy da basqalar jetkiziledi.
Kezdesý sońynda taraptar iskerlik baılanysty jandandyryp, MAK qyzmetin jańǵyrtýdy pysyqtaý, sondaı-aq basym sektorlardaǵy, ásirese, agroónerkásip keshenindegi yntymaqtastyqty arttyrý jóninde kelisti.
Aıta keteıik, Eýroodaq elderi Ýkraınaǵa 90 mıllıard eýro nesıe beredi.