Qazaqstan men Túrikmenstan arasyndaǵy ózara saýda kólemi 5 jylda 4 esege ulǵaıǵan

ASTANA. KAZINFORM – Qazaqstan Respýblıkasy Premer-Mınıstriniń birinshi orynbasary Roman Sklıar Túrikmenstan Mınıstrler Kabıneti tóraǵasynyń orynbasarlary Batyr Atadaevpen jáne Baımyrat Annamammedovpen kezdesti.

QR Úkimeti baspasóz qyzmetiniń habarlaýynsha, kezdesý aıasynda Qazaqstan men Túrikmenstandaǵy ekonomıkalyq ahýal týraly pikir almasý, qazaqstan-túrikmenstan saýda-ekonomıkalyq yntymaqtastyǵynyń qazirgi jaı-kúıi men damý perspektıvalary, sondaı-aq energetıka salasyndaǵy ózara is-qımyl talqylandy.

Eki el de ózara is-qımyldyń barlyq spektri boıynsha saýda-ekonomıkalyq yntymaqtastyqty údemeli túrde keńeıtýde. Máselen, 5 jyl ishinde elder arasyndaǵy ózara saýda kólemi 4 esege ulǵaıdy, tek sońǵy jyldyń ózinde 28%-ǵa ósti. Bıylǵy 6 aıda taýar aınalymy $237,2 mln-dy qurady.

Roman Sklıar Qazaqstan men Túrikmenstan arasyndaǵy ózara is-qımyl áriptestik pen tatý kórshilik rýhynda damyp kele jatqanyn, sondaı-aq ekijaqty ekonomıkalyq yntymaqtastyqty damytýdyń úlken perspektıvalary bar ekenin atap ótti.

Taraptar qabyldanǵan sheshimder qazaqstan-túrikmenstan ózara is-qımylynyń barlyq baǵyttary boıynsha ekijaqty qarym-qatynastardy damytýǵa qosymsha serpin beretinine senim bildirdi.