Qazaqstan men Túrikmenstan saýda aınalymyn 1 mlrd dollarǵa jetkizýdi kózdeıdi
ASTANA. KAZINFORM — Ashǵabat qalasyna resmı sapary aıasynda Qazaqstannyń Syrtqy ister mınıstri Ermek Kósherbaev Túrikmenstan Mınıstrler kabıneti tóraǵasynyń orynbasary, Syrtqy ister mınıstri Rashıd Meredovpen kelissózder ótkizdi.
QR SІM baspasóz qyzmeti atap ótkendeı, kezdesý barysynda syrtqy saıası vedomstvolardyń basshylary Qazaqstan men Túrikmenstan arasyndaǵy ózara is-qımyldyń keń aýqymdy máselelerin talqylady. Atap aıtqanda, saıası dıalogty odan ári nyǵaıtý, sondaı-aq saýda-ekonomıkalyq, ınvestıtsııalyq, kólik-logıstıka, energetıka jáne mádenı-gýmanıtarlyq salalardaǵy yntymaqtastyqty keńeıtý máselelerine erekshe nazar aýdaryldy.
Taraptar strategııalyq seriktestikti odan ári damytýǵa beıildiligin rastap, ekijaqty qatynastardy nyǵaıtýdaǵy bıik jáne joǵary deńgeıdegi turaqty baılanystardyń mańyzdy rólin atap ótti.
— Túrikmenstan — biz úshin ǵasyrlar boıy qalyptasqan dostyq pen tatý kórshilik dástúrleri baılanystyrǵan jaqyn baýyrlas memleket. Birlesken kúsh-jigerdiń arqasynda memleketaralyq qatynastarymyz sapalyq jańa deńgeıge kóterildi, — dedi Qazaqstannyń Syrtqy ister mınıstri.
Óz kezeginde R.Meredov túrikmen tarapynyń ekijaqty kún tártibiniń barlyq baǵyty boıynsha praktıkalyq ózara is-qımyldy odan ári keńeıtýge daıyn ekenin rastady.
Kelissózderdiń negizgi taqyryptarynyń biri saýda-ekonomıkalyq yntymaqtastyqty damytý boldy. 2026 jyldyń alǵashqy tórt aıynyń qorytyndysy boıynsha ózara saýda kólemi 6,8%-ǵa ósip, shamamen 180 mln AQSh dollaryna jetkeni atalyp ótti. Memleket basshylarynyń tapsyrmasyna sáıkes taraptar bul kórsetkishti 1 mlrd AQSh dollaryna jetkizýge daıyn ekendikterin rastady.
Mınıstrler 2026 jylǵy 24 maýsymda Astanada ótken Saýda-ekonomıkalyq, ǵylymı-tehnıkalyq jáne mádenı-gýmanıtarlyq yntymaqtastyq jónindegi Qazaqstan-Túrikmenstan Úkimetaralyq komıssııasynyń 14-otyrysynyń qorytyndylaryn joǵary baǵalap, onyń birlesken jobalardy ilgeriletýdegi mańyzdy rólin atap ótti.
Taraptar eki memleket arasyndaǵy uzaq merzimdi qatynastardyń berik negizi retinde mádenı-gýmanıtarlyq yntymaqtastyqty keńeıtý perspektıvalaryn talqylady. Bilim berý, ǵylym, mádenıet jáne densaýlyq saqtaý salalaryndaǵy ózara is-qımyldy damytý máseleleri qarastyryldy.
Mınıstrler óńirlik jáne halyqaralyq kún tártibindegi ózekti máseleler boıynsha pikir almasyp, BUU, TMD jáne basqa da halyqaralyq uıymdar aıasyndaǵy tyǵyz úılestirýdi jalǵastyrýǵa daıyn ekendikterin rastady. Ortalyq Azııadaǵy beıbitshilik, qaýipsizdik pen ornyqty damýdy nyǵaıtý, sondaı-aq Aýǵanstandy damytý máseleleri boıynsha ózara is-qımylǵa erekshe nazar aýdaryldy.
E.Kósherbaev Túrikmenstan tarapyna Ortalyq Azııa memleketteri basshylarynyń Konsýltatıvtik kezdesýlerine jáne TMD-daǵy tóraǵalyǵy aıasyndaǵy jumysyna tabys tiledi.
Taraptar strategııalyq seriktestikti odan ári nyǵaıtý baǵytyndaǵy birlesken jumysty jalǵastyrýǵa daıyn ekendikterin bildirdi.
Kelissózder qorytyndysy boıynsha Qazaqstan Respýblıkasy Syrtqy ister mınıstrligi men Túrikmenstan Syrtqy ister mınıstrligi arasyndaǵy 2027–2028 jyldarǵa arnalǵan yntymaqtastyq baǵdarlamasyna qol qoıyldy.
Buǵan deıin Qazaqstannyń Prezıdenti Túrikmenstan Halk Maslahatynyń tóraǵasyn týǵan kúnimen quttyqtaǵanyn jazǵanbyz.
