Qazaqstan men Túrikmenstan medıaseriktestiktiń jańa kezeńine qadam basty
ASTANA. KAZINFORM — 2026 jylǵy 8 qazanda «Avaza» ulttyq týrıstik aımaǵynda (Túrikmenstan) QR Prezıdentiniń Teleradıokesheni men Túrikmenstannyń Teledıdar, radıohabar taratý jáne kınematografııa jónindegi memlekettik komıteti Qazaq-túrikmen turaqty medıa keńesin qurý týraly kelisimge qol qoıdy.
Atalǵan qujat Ortalyq Azııa elderi men Ázerbaıjan basshylarynyń konsýltatıvtik basqosýynda jáne TMD Memleket basshylary keńesiniń otyrysynda bekitildi.
Bul kelisim 2024 jyly Qasym-Jomart Toqaevtyń Túrikmenstanǵa resmı sapary kezinde qabyldanǵan dostyq pen kópqyrly strategııalyq áriptestikti nyǵaıtý týraly deklaratsııany júzege asyrý jónindegi keshendi baǵdarlamanyń taǵy bir tarmaǵyn oryndady.
Taraptar bul qadamdy Qazaqstan men Túrikmenstannyń medıa salasyndaǵy tarıhı beles dep baǵalady. Kelisim qos eldiń ortaq aqparattyq keńistigin damytýǵa, ózara kontent almasýǵa, turaqty ókildikter ashyp, habar taratý jelisin júıeli úılestirýge jol ashady.
Qazaq-túrikmen turaqty medıa keńesin qurý týraly kelisim — eki eldiń BAQ yntymaqtastyǵy tarıhyndaǵy alǵashqy qujat ári memleketter arasyndaǵy joǵary senimniń kórinisi.
Kelisim aıasynda jaqyn ýaqytta Túrikmenstanda qazaqstandyq Silk Way jáne Silk Way Cinema halyqaralyq telearnalary habar taratady.
Qazaqstan Prezıdentiniń Teleradıokesheni Ortalyq Azııa elderiniń medıa uıymdarymen jáne osy salaǵa jaýapty mekemelerimen baılanysyn keńeıtý arqyly óńirdiń ortaq aqparattyq keńistigin qalyptastyrýdy kózdeıdi.
Anyqtama
QR Prezıdentiniń Teleradıokesheni — medıakontentti óndirý men taratýdyń tolyq tsıklin júzege asyratyn Qazaqstandaǵy eń iri medıa kompanııalardyń biri.
Kompanııa quramyna qazaqstandyq kórermenge arnalǵan Jibek Joly telearnasy men attas radıo, Silk Way, Silk Way Cinema jáne Silk Way Prime halyqaralyq telearnalary, Kazinform halyqaralyq aqparat agenttigi, Derekti kıno ortalyǵy jáne TRKLAB tsıfrlyq medıa bólimi kiredi.
Túrikmenstannyń Teledıdar, radıohabar taratý jáne kınematografııa jónindegi memlekettik komıteti — eldegi BAQ salasyna jaýapty ortalyq memlekettik organ. Onyń quramynda 8 telearna, 4 radıostantsııa, birneshe aqparattyq portal jáne «Túrikmenfılm» kınostýdııasy bar.
Buǵan deıin Prezıdent teleradıokesheniniń derekti fılmi halyqaralyq «Eýrazııa.DOC» festıvalinde arnaıy dıplomǵa ıe bolǵanyn jazǵan edik.
