Qazaqstan men Túrikmenstan quqyq qorǵaýda yntymaqtastyqty nyǵaıtyp jatyr — Senat
ASTANA. KAZINFORM — Búgin Senattyń jalpy otyrysynda «Qazaqstan Úkimeti men Túrikmenstan arasyndaǵy qylmyskerlikke qarsy kúrestegi yntymaqtastyq týraly kelisimdi ratıfıkatsııalaý týraly» Zańy maquldandy.
Zańnyń maqsaty — qylmysqa qarsy kúreste yntymaqtastyqty damytý jáne nyǵaıtý, eki memleket azamattarynyń quqyqtary men bostandyqtaryn qorǵaýdy qamtamasyz etý.
Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń málimetine qaraǵanda, qujatta qylmyskerlikke qarsy kúres salasyndaǵy tıimdi yntymaqtastyq úshin quqyqtyq negiz qurýǵa baǵyttalǵan erejeler bar.
Kelisimde mynalardy:
— uıymdasqan qylmyskerlikti;
— terrorızm jáne ekstremızm, olardy qarjylandyrýdy;
— esirtki, qarý-jaraq, kóshi-qon jáne adam saýdasyna baılanysty qylmystardy;
— sybaılas jemqorlyq, ekonomıkalyq jáne kıberqylmystardy qosa alǵanda qylmystardyń aldyn alý, anyqtaý, jolyn kesý, ashý jáne tergep-tekserý jónindegi birlesken sharalar kózdelgen.
— Jedel jáne krımınalıstıkalyq aqparat almasýdy, mamandardyń ózara is-qımylyn jáne tájirıbe almasý úshin olardyń ózara baǵytyn, qylmyskerlikke qarsy kúres máseleleri boıynsha quzyretti organdardyń suraý salýlaryn oryndaýdy, sondaı-aq eki taraptyń ýákiletti organdarynyń tıimdi ózara is-qımylyn qamtamasyz etý maqsatynda kadrlardy oqytý men olardyń biliktiligin arttyrýdy uıymdastyrýdy qamtıtyn yntymaqtastyq nysandary aıqyndaldy. Kelisimde alynǵan aqparatty jarııa etpeý, suraý salýdy oryndaýdan bas tartýdyń, daýlardy retteýdiń yqtımal negizderi, sondaı-aq Kelisimdi ózgertý jáne toqtatý tártibi týraly erejeler belgilengen, — delingen Senat komıtetiniń aqparatynda.
Kelisimdi ratıfıkatsııalaý eki eldiń quqyq qorǵaý organdarynyń ózara is-qımylynyń tıimdiligin arttyrýǵa múmkindik beredi, óńirlik qaýipsizdikti jáne tutastaı alǵanda ekijaqty qatynastardy nyǵaıtýǵa yqpal etetin bolady. Qazaqstan Bolgarııa, Majarstan, Italııa, Qytaı, Saýd Arabııasy, Túrkııa, Ózbekstan, Frantsııa, BAÁ jáne basqalardy qosa alǵanda, osyndaı kelisimderdi jıyrmadan astam elmen bekitti.
Eske salsaq, bıyl kúzde Memleket basshysy Qasym-Jomart Toqaev «Qazaqstan Respýblıkasynyń Úkimeti men Túrikmenstan Úkimeti arasyndaǵy ınvestıtsııalardy ózara kótermeleý jáne qorǵaý týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.