Qazaqstan men Túrikmenstan kóshi-qon salasyndaǵy yntymaqtastyq týraly kelisimge qol qoıdy
ASTANA. KAZINFORM — QR Іshki ister mınıstri Erjan Sadenov Túrikmenstannyń memlekettik kóshi-qon qyzmetiniń tóraǵasy Amanmýhammet Sazakovpen kezdesti. Bul týraly vedomstvonyń baspasóz qyzmeti habarlady.
Іs-shara Túrikmenstan Prezıdentiniń Qazaqstanǵa memlekettik sapary aıasynda ótti.
Kezdesý barysynda vedomstvoaralyq ózara is-qımyldyń jaı-kúıi men ony odan ári damytý perspektıvalary talqylandy. Sonymen qatar eki eldiń vedomstvo basshylary Qazaqstan Respýblıkasy Úkimeti men Túrikmenstan Úkimeti arasyndaǵy kóshi-qon salasyndaǵy yntymaqtastyq týraly kelisimge qol qoıdy.
Taraptar áriptestik qatynastardy odan ári damytýǵa qyzyǵýshylyq tanytty.
Aıta keteıik, Qasym-Jomart Toqaev Túrikmenstan Prezıdentin Aqordada qarsy aldy.
Memleket basshysy Túrikmenstan Prezıdenti Serdar Berdimuhamedovti «Altyn Qyran» ordenimen marapattady.
Eki el Prezıdenti kelissóz júrgizip, Birlesken málimdemege qol qoıdy.
Qazaqstan men Túrikmenstan kókónis pen jemiske arnalǵan «jasyl dálizdi» keńeıtedi.