Qazaqstan men Túrikmenstan kóshi-qon salasyndaǵy yntymaqtastyq týraly kelisimdi ratıfıkatsııalamaq

ASTANA. KAZINFORM — Qazaqstan Úkimeti men Túrikmenstan Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly qaýly jobasy 2 naýryzǵa deıin «Ashyq NQA» portalynda qoǵamdyq talqylaýǵa shyǵaryldy. 

Jobany Іshki ister mınıstrligi qoldanystaǵy zańnamaǵa sáıkes ázirlegen. Atap aıtqanda, qujat «Qazaqstan Respýblıkasynyń halyqaralyq sharttary týraly» jáne «Halyqtyń kóshi-qony týraly» zańdarynyń talaptary negizinde daıyndaldy.

— Kelisimdi ratıfıkatsııalaý kóshi-qon salasynda aqparat almasýdy jolǵa qoıýǵa, sondaı-aq qos azamattyq pen zańsyz kóshi-qonǵa qarsy is-qımyl baǵytyndaǵy ekijaqty yntymaqtastyqty nyǵaıtýǵa múmkindik beredi, — delingen habarlamada.

Sonymen qatar, kelisimniń negizgi maqsaty — kóshi-qon protsesterin tıimdi retteý, aqparattyq ózara is-qımyldy damytý jáne atalǵan saladaǵy quqyqbuzýshylyqtardyń aldyn alý boıynsha ózara qolaıly jaǵdaı jasaý.

Eske sala keteıik, Qazaqstan men Túrikmenstan úkimetteri qylmysqa qarsy birlese kúresedi.