Qazaqstan men Túrikmenstan halyqaralyq marshrýttaǵy júrgizýshiler úshin vızalyq rejımdi joımaq
ASTANA. KAZINFORM — Qazaqstan men Túrikmenstan arasynda «ruqsatsyz» júk tasymaldaý júıesi engizilmek. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«2024 jyldyń 8 aıynyń qorytyndysynda Transkaspıı halyqaralyq kólik baǵyty (budan ári — THKB nemese Orta dáliz) arqyly tasymaldaý 2,9 mln tonnaǵa jetip, ótken jyldyń kórsetkishimen (1,75 mln tonna) salystyrǵanda 69 paıyzǵa ulǵaıdy. 2022 jylǵy 25 qarashada Aqtaýda Qazaqstan, Ázerbaıjan, Grýzııa jáne Túrkııa arasynda 2027 jylǵa deıin Orta dálizdi damytý jónindegi jol kartasyna qol qoıyldy. Ony iske asyrý dálizdiń ótkizý qabiletin jylyna 10 mln tonnaǵa deıin ulǵaıtýǵa múmkindik beredi. Bıyl 10 qazanda Qazaqstan men Túrikmenstan arasyndaǵy kólik, logıstıka jáne tranzıt salasyndaǵy strategııalyq yntymaqtastyq týraly kelisimge qol qoıyldy. Onda «ruqsatsyz» júk tasymaldaý júıesin engizý, sondaı-aq eki eldiń halyqaralyq marshrýttaǵy júrgizýshileri úshin vızalyq rejımdi alyp tastaý múmkindigi kózdeledi. Bul osy baǵyttaǵy júk tasymaldary kólemin ulǵaıtýǵa yntalandyryp, soǵan járdemdesedi», — dedi Úkimet basshysy jaýabynda.
Sondaı-aq Premer-Mınıstr «Aqtaý teńiz saýda porty» UK» AQ men «Túrikmenstannyń teńiz saýda floty» AQ arasynda «THKB» marshrýty boıynsha teńiz tasymaldary áleýetin keńeıtetin yntymaqtastyq týraly memorandýmǵa qol qoıylǵanyn atap ótedi.
«Qazirgi ýaqytta qazaqstandyq aýyl sharýashylyǵy ónimderi Qazaqstan–Túrikmenstan–Iran (Inchebýrýn), Qazaqstan–Ózbekstan–Túrikmenstan–Iran (Serahs) temirjol baǵyttarymen Iranǵa jáne Iran aýmaǵy arqyly (Bender Abbas porty) Parsy shyǵanaǵy elderine tasymaldanýda. Budan basqa, qazaqstandyq júkter Aqtaý jáne Quryq porttary arqyly Irannyń Amırabad jáne Anzalı porttaryna jetkiziledi. Júk jóneltýshilerdiń ótinimderine sáıkes dándi daqyldardy aýystyryp tıeý boıynsha porttardyń qoldanystaǵy qýaty osy jyldyń sońyna deıin kólemdermen qamtamasyz etilgen», — dedi ol.
Eske salsaq, budan buryn Túrikmenstan gazyn Qazaqstanǵa jetkizý máselesi qarastyrylyp jatqany habarlandy.