Qazaqstan men Túrikmenstan arasyndaǵy ınvestıtsııa týraly qujat qabyldandy
ASTANA. KAZINFORM – Búgin Májilistiń jalpy otyrysynda «Qazaqstan Úkimeti men Túrikmenstan Úkimeti arasyndaǵy ınvestıtsııany ózara kótermeleý jáne qorǵaý týraly kelisimdi ratıfıkatsııalaý týraly» zań qabyldandy.
- 2024 jylǵy 10 qazanda Memleket basshysy Qasym-Jomart Toqaevtyń Ashhabad qalasyna resmı sapary barysynda atalǵan kelisimge qol qoıyldy. Bul kelisim Qazaqstan men Túrikmenstan arasyndaǵy jańa ekijaqty qujat jáne eki memlekettiń ınvestıtsııalyq múmkindik bere otyryp, yntymaqtastyqty jańa deńgeıge kóterýge arnalǵan. Investıtsııany kótermeleý jáne qorǵaý týraly kelisim, ınvestıtsııa tartýdyń mańyzdy kórsetkishi. Jalpy ekijaqty ınvestıtsııalyq kelisim ınvestorlarǵa quqyqtyq kepildik berip qana qoımaı, ınvestıtsııalyq qyzmetti júrgizý úshin ashyq jáne boljamdy jaǵdaıdy qamtamasyz etedi. Sondaı-aq kelisim eksproprıatsııadan qorǵaý, halyqaralyq arbıtrajǵa qol jetkizý jáne sheteldik ınvestıtsııany ádil qaraý sııaqty mańyzdy máselelerdi bekitedi, - dedi Syrtqy ister mınıstriniń orynbasary Álibek Qýantyrov Májilistiń jalpy otyrysynda.
Mınıstr orynbasarynyń málimdeýinshe, Qazaqstan men Túrikmenstan arasyndaǵy qarym-qatynas táýelsizdik alǵan sátten bastap dostyq, yntymaqtastyq rýhynda damyp keledi.
- Ótken jyly qazaqstandyq ınvestorlardan Túrikmenstanǵa tikeleı ınvestıtsııanyń jalpy aǵyny 16,1 mln AQSh dollary. Bul 2023 jylmen salystyrǵanda 24% joǵary. Al 2008 jyldan bastap sanasaq, bizdiń Túrikmenstanǵa quıǵan ınvestıtsııa kólemi 113 mln AQSh dollarǵa jetti. Byltyr Túrikmenstannan Qazaqstanǵa 0,4 mln AQSh dollar kóleminde ınvestıtsııa keldi. 2008 jyldan bastap eseptesek, 24 mln AQSh dollar ınvestıtsııa quıyldy. 2024 jyly ekijaqty taýar aınalymy 1,3%-ǵa tómendep, 555 mln AQSh dollarǵa jetti, - deıdi ol.
Sáýirde Qazaqstan Túrikmenstanmen gaz jáne kólik ınfraqurylymy salalarynda yntymaqtastyqty nyǵaıtatyny týraly habarlaǵan edik.
Bul másele jónine Prezıdent Qasym-Jomart Toqaevtyń Túrikmenstan Halk Maslahatynyń Tóraǵasy Gýrbangýly Berdimuhamedovpen beıresmı kezdesýinde egjeı-tegjeıli aıtyldy.