Qazaqstan men Túrikmenstan arasynda temir jolmen júk tasymaldaý kólemi artyp keledi
ASTANA. KAZINFORM – Qazaqstan men Túrikmenstan arasynda temir jolmen júk tasymaldaý kólemi artyp keledi. Bul týraly búgin Túrikmenstan Syrtqy ister mınıstri Rashıd Meredovpen kelissózderden keıin birlesken málimdeme jasaǵan Premer-Mınıstrdiń orynbasary – Syrtqy ister mınıstri Murat Nurtileý aıtty.
«Bizdiń ózara qarym-qatynasymyzdyń taǵy bir myqty dińgegi – tranzıttik-kóliktik yntymaqtastyqty ári qaraı belsendi damytýǵa erekshe mán beremiz. Astana men Ashǵabat – transkontınentaldyq júk tasymaldaý júıesiniń mańyzdy ári tıimdi músheleri. Eki el arqyly Azııa – Eýropa, Azııa – Taıaý Shyǵys marshrýttaryn damytý elderimizdiń dúnıejúzilik qaýymdastyqtaǵy rólin nyǵaıta túsedi degen pikirdemiz. Zor múmkindikke ıe «Qazaqstan – Túrikmenstan – Iran» temirjol magıstraliniń áleýetin keshendi túrde damytýǵa sóz baılastyq. Birlesken kúsh-jigerdiń arqasynda ótken jylǵy elderimizdiń arasyndaǵy temir jolmen júk tasymalynyń kólemi 20 paıyzǵa ósip, 1,3 mln tonnaǵa jetken. Sonymen qatar, Qazaqstan Túrikmenstannyń «Soltústik-Ońtústik» halyqaralyq kólik dálizine qosylýyna árqashan qoldaý kórsetip keledi», - dedi Murat Nurtileý.
Osy rette vıtse-premer Aqtaý men Túrkmenbashı porttary arasyndaǵy júk tasymaldaý kólemin birneshe ese arttyrýǵa keliskenderin atap ótti.
«Sońǵy úsh jyldan beri bul baǵyt boıynsha júk aýystyryp tıeý 50 paıyzǵa óskenin atap ótken jón. Avtomobıl joldarynyń túıisýi shekaralyq óńirler ekonomıkalaryna yqpal etip qana qoımaı, jalpy júk tasymalyn edáýir ulǵaıtady. Eki el arasyndaǵy energetıkalyq yqpaldastyq qarym-qatynastarymyzdyń qarqyndy damyp jatqanyn qanaǵat sezimmen atap ótemin. Qazaqstan energetıka salasyndaǵy ekijaqty yntymaqtastyqty uzaq merzimdi negizde óristetýge úlken mán beredi. Bul baǵytta túrikmen tarapyna birneshe usynys joldandy. Osy oraıda, gaz óndirý men óńdeý, tasymaldaýdyń ozyq tehnologııalarymen almasýǵa erekshe nazar aýdaryldy. Tıisti kelissózder nátıjesi boıynsha jańa ken oryndarynda birlesken kásiporyndar ashý múmkindigi – kún tártibindegi túıindi másele», - dedi ol.
