Qazaqstan men Túrikmenstan arasynda taýar aınalymy 1 mlrd dollarǵa deıin artpaq

ASTANA. KAZINFORM – Qazaqstan men Túrikmenstan arasyndaǵy taýar aınalymyn 1 mlrd dollarǵa deıin artpaq. Bul týraly búgin Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovpen ótken kelissózden keıin QR Premer-Mınıstriniń orynbasary – Syrtqy ister mınıstri Murat Nurtileý aıtty. 

— Búginde Qazaqstan men Túrikmenstan arasynda túıini tarqamaǵan esh másele joq. Kerisinshe saýda, ónerkásip, energetıka, transport, logıstıka salalaryndaǵy ózara tıimdi jobalar keń óristi seriktestiktiń pármendi draıverine aınaldy. Jańa ǵana qadirli áriptesim Rashıd Ovezgeldıevıchpen dástúrli dostyq jáne ózara senim rýhynda kelissózder ótkizdik. Ekijaqty yntymaqtastyqtyń ótken jylǵy qorytyndylaryn talqylap, tyń baǵyttar men irgeli mindetterdi aıqyndadyq.
Jalpy, atqarylyp jatqan jumystar nátıjeli. Sondaı-aq olardy sapaly jáne bekitilgen merzimde oryndaý úshin kúsh-jigerimizdi salýǵa kelistik. Kezdesýde Parlamentaralyq jáne Úkimetaralyq baılanystardy odan ári keńeıtýge múddelilik tolyq qýattaldy, - dedi Murat Nurtileý. 

Sondaı-aq ol eki el kóktem aılarynda saıası konsýltatsııalar ótkizýge keliskenin atap ótti. 

— Ekonomıkalyq yntymaqtastyqty odan ary tereńdetý eki tarap úshin ózekti de ózara tıimdi másele. Keıingi jyldary taýar aınalymy 4 ese ósti. Qazirgi tańda onyń aýqymy 500 mln AQSh dollaryna jýyq. Ýaǵdalastyqtarǵa sáıkes, oń dınamıkany saqtaı otyryp, kórsetkishti 1 mlrd dollarǵa deıin arttyrýdy kózdeýdemiz.  Osy maqsatqa jetý jolynda úkimetaralyq komıssııa taýar nomenklatýrasyn keńeıtý jónindegi jumys toby jáne iskerlik keńesti jandandyrýǵa ýaǵdalasty, - dedi QR SІM basshysy. 

Qazirdiń ózinde Qazaqstan Túrikmenstanǵa eksport kólemin 120 mıllıon dollarǵa deıin ulǵaıtýǵa daıyn.

Sondaı-aq Qazaqstan men Túrikmenstan kópjaqty strategııalyq seriktestikti tereńdetý týraly deklaratsııa qabyldaǵan edi.