Qazaqstan men Túrkııanyń Baýyrlastyq alleıasy keńeıe tústi
«Búgin QR Syrtqy ister mınıstrliginiń erekshe tapsyrmalar jónindegi elshisi Erjan Muqash myrzamen, sondaı-aq Almaty aýdany ákiminiń orynbasary Ramıl Dosmaǵambetov myrzamen birge 30 túp aǵash otyrǵyzdyq. Ótken jyly Qazaqstan Respýblıkasy táýelsizdiginiń 30 jyldyǵy aıasynda da 30 túp aǵash otyrǵyzyp, Qazaqstan men Túrkııanyń «Baýyrlastyq alleıasyn» ashqan bolatynbyz», - deıdi Túrkııa Respýblıkasynyń Qazaqstandaǵy Elshisi Ýfýk Ekıdjı.
Ol baýyrlas elderdiń ekijaqty qarym-qatynasy men yntymaqtastyq salasy jańa serpinmen damý ústinde ekenine nazar aýdarady.
«Ózderińizge málim, jaqyn arada Prezıdent Qasym-Jomart Toqaev Túrkııaǵa resmı saparmen barǵan bolatyn. Aldaǵy ýaqytta da birqatar delegatsııalardyń kelýi, sondaı-aq ekijaqty saparlardyń júzege asýy kútiledi. Ekonomıkalyq qatynastar jaǵynan saýda-sattyq jáne ınvestıtsııa salasy joǵary deńgeıde ekenin kórip otyrmyz. Byltyr jyldyq ınvestıtsııa mólsheri boıynsha rekord ornatyldy. Al, ekijaqty saýda kólemi 5 mlrd dollardan asty, aldaǵy ýaqytta 10 mlrd dollarǵa jetkizýge tyrysamyz. Sonymen qatar, Túrkııadan Qazaqstanǵa quıylǵan ınvestıtsııa mólsheri 4 mlrd dollarǵa jetti, al Qazaqstannan Túrkııaǵa jasalǵan ınvestıtsııa kólemi 1 mlrd dollardan astam. Saıası-ekonomıkalyq, mádenı, áskerı jáne basqa salalardaǵy baılanystarymyz damyp keledi. Bul - biz úshin zor qýanysh, maqtanysh. Bıyl qazan aıynda Prezıdentimizdiń Qazaqstanǵa saparmen kelýi kútilip otyr. Sondyqtan, aldaǵy ýaqytta yntymaqtastyǵymyzdyń odan ári kúsheıe túsetinine senemin», - dedi Ýfýk Ekıdjı.
Sondaı-aq, ol saıabaqta otyrǵyzylǵan aǵashtar máńgilik dostyq pen baýyrlastyqtyń nyshany bolatynyna senim bildirip, sharaǵa demeýshilik kórsetken túrik kásipkeri Ramazan myrzaǵa alǵys aıtty.
«Qazaqstannyń astanasy – ásem qala Nur-Sultanda osyndaı sharalar uıymdastyrý arqyly kógaldandyrýǵa jáne qorshaǵan ortany qorǵaýǵa óz úlesimizdi qosa beremiz», - dedi Elshi.
Ashyq kózderden alynǵan foto
