Qazaqstan men Túrkııa júk tasymalyna elektrondy ruqsat berý júıesin engizdi
ASTANA. KAZINFORM — Qazaqstan men Túrkııa tranzıttik júk tasymalyna arnalǵan elektrondy ruqsat qujattaryn qoldanysqa engizdi. Bul týraly Astanada ótip jatqan New Silk Way halyqaralyq forýmynda Túrkııanyń Kólik jáne ınfraqurylym mınıstriniń orynbasary Osman Boıraz aıtty.
Onyń aıtýynsha, Túrkııa halyqaralyq avtomobıl tasymalyn tsıfrlandyrýǵa erekshe kóńil bólip otyr. Osy baǵytta Ózbekstanmen birlesip iske qosylǵan elektrondy ruqsat berý júıesin basqa elderge de keńeıtip jatyr.
— Qazaqstanmen osy saladaǵy yntymaqtastyǵymyzdyń nátıjesinde tranzıttik tasymalǵa arnalǵan elektrondy ruqsat qujattary tasymaldaýshylarǵa qoljetimdi boldy. Bul qujattardy alýdy jeńildetip, ákimshilik rásimderdi jyldam júrgizýge jáne olardyń oryndalýyn baqylaýǵa múmkindik beredi, — dedi Osman Boıraz.
Túrkııa ókili Orta dáliz arqyly júk tasymaldaýdy damytýda tsıfrlyq tehnologııalardyń mańyzy artyp kele jatqanyn aıtty. Onyń sózinshe, júktiń qaı jerde ekenin baqylaý, tasymal kezindegi kidiristerdiń keıingi kezeńderge áserin anyqtaý jáne der kezinde sheshim qabyldaý halyqaralyq saýdanyń senimdiligi úshin mańyzdy.
— Bizdiń maqsatymyz — júk qozǵalysy týraly aqparat tasymaldyń barlyq kezeńinde qoljetimdi bolatyn, kóliktiń bir túrinen ekinshisine aýysý jeńildeıtin jáne logıstıkalyq úderisterdi aldyn ala josparlaýǵa múmkindik beretin júıe qurý, — dedi ol.
Onyń aıtýynsha, Orta dálizdegi tsıfrlyq yntymaqtastyqty damytý úshin elderdiń qoldanystaǵy aqparattyq júıelerin ortaq standarttar negizinde baılanystyrý qajet. Bul rette qandaı málimetti kim jáne qandaı ókilettikpen bólisetini aldyn ala kelisilýi tıis.
Túrkııa tarapy osy baǵyttaǵy jumysty naqty bir tasymal baǵyty boıynsha bastap, aqparat almasý tártibin, derekterge qol jetkizý quqyǵyn jáne jaýapty mekemelerdiń mindetterin birlesip aıqyndaýdy usynyp otyr.
— Bizdiń maqsatymyz — búkil dáliz boıynda turaqty ári senimdi jumys isteıtin ortaq tsıfrlyq qyzmet qalyptastyrý. Túrkııa bul baǵytta óńirdegi seriktesterimen birlesip jumys isteýge daıyn, — dedi Osman Boıraz.
Aıta keteıik, buǵan deıin Chehııanyń Kólik mınıstri «Tsıfrlyq Jibek jolyn» damytýdyń úsh basym baǵytyn ataǵan edi.
