Qazaqstan men Túrkııa júk tasymaldaý salasynda birqatar mańyzdy kelisimge keldi

ASTANA. KAZINFORM – Túrkistanda halyqaralyq avtomobıl tasymaldary máseleleri boıynsha Qazaqstan-Túrkııa komıssııasynyń otyrysy ótti. Bul týraly QR Kólik mınıstrligi habarlady. 

Qazaqstan men Túrkııa avtokólikpen júk tasymaldaý salasyndaǵy yntymaqtastyqty odan ári nyǵaıtýǵa múmkindik beretin birqatar mańyzdy kelisimge keldi.

Atap aıtqanda:

1. Taraptar tranzıttik tasymaldarǵa arnalǵan ruqsat júıesin joıý jáne erkin tranzıtke kóshý týraly kelisimge keldi. Halyqaralyq kelisimge ózgerister engizilgenge deıin tranzıttik blankiler shekteýsiz berile beredi.

2. Túrkııa qazaqstandyq tasymaldaýshylarǵa óz teńiz porttarynda júkterdi tıeý men túsirý múmkindigin beredi. Buǵan deıin bul tek túrik kompanııalaryna ǵana tıesili ereje bolatyn.

3. Ruqsat berý blankilerimen almasý endi tsıfrlyq formatqa aýystyrylady. Bul jumys bıylǵy jyldyń sońyna deıin atqarylady. Eske salsaq, buǵan deıin Qytaı jáne Ózbekstan elderimen sheteldik ruqsat berý blankilerimen almasý elektrondyq formatqa aýystyrylǵan edi. Bul — júk tasymaldaý úderisin barynsha jeńildetip, adamı faktordy joıýǵa múmkindik beredi.

Qol qoıylǵan hattama Qytaı – Eýropa baǵyty boıynsha tranzıttik áleýetti damytýǵa múmkindik beredi.

Aıta keteıik, Qazaqstan qoǵamdyq qaýipsizdik salasyndaǵy halyqaralyq yntymaqtastyqty kúsheıtip jatyr.