Qazaqstan men Túrkııa úkimetaralyq komıssııasy otyrysynda ekonomıkalyq yntymaqtastyqty damytý talqylandy
Otyrys barysynda taraptar eki el arasyndaǵy saýda-ekonomıkalyq yntymaqtastyqty damytýdyń aýqymdy máselelerin talqylady. Atap aıtqanda, tranzıttik-kólik, ónerkásip, týrızm, geologııa, densaýlyq saqtaý jáne agroónerkásiptik keshen salalaryndaǵy ózara is-qımyl máseleleri qaraldy. Sondaı-aq eki el arasyndaǵy áýe joldarynyń geografııasyn keńeıtý jáne turaqty reıster sanyn arttyrý qajettiligine nazar aýdaryldy.
Túrkııa — Qazaqstannyń mańyzdy saýda-ekonomıkalyq jáne ınvestıtsııalyq seriktesteriniń biri. Ótken jyldyń qorytyndysy boıynsha Qazaqstan men Túrkııa arasyndaǵy taýar aınalymy 33%-ǵa ósip, $4,1 mlrd asty. Eki el áriptestiginiń strategııalyq sıpatyna toqtalǵan QR Premer-Mınıstri 2021 jyly Qazaqstannan Túrkııaǵa eksport 39%-ǵa ósip, shamamen $3 mlrd jetkenin, 2021 jyly Túrkııadan Qazaqstanǵa ımport 20,5%-ǵa artyp, $1,1 mlrd quraǵanyn atap ótti.
Búgingi tańda túrik bıznesi Qazaqstanda jalpy quny $5,5 mlrd quraıtyn ınvestıtsııalyq jobalardy júzege asyryp jatyr. Óz kezeginde Túrkııa vıtse-prezıdenti F. Oktaı Túrkııa Respýblıkasy Qazaqstanmen barlyq baǵyttar boıynsha ekijaqty yntymaqtastyqty ári qaraı nyǵaıtýǵa daıyn ekenin, munyń ózara tıimdi áriptestikti damytýǵa yqpal etetinin atap ótti.
Otyrys aıasynda ekonomıkalyq yntymaqtastyq boıynsha jan-jaqty kelissózder júrgizildi. Qazaqstan tarapynan ındýstrııa jáne ınfraqurylymdyq damý mınıstri, saýda jáne ıntegratsııa, ulttyq ekonomıka, densaýlyq saqtaý vıtse-mınıstrleri jáne basqalary qatysty. Túrik tarapynan ındýstrııa jáne tehnologııa, saýda, kólik jáne ınfraqurylym, densaýlyq saqtaý vıtse-mınıstrleri qatysty. Sońynda ÚAK otyrysynyń qorytyndy hattamasyna qol qoıylyp, birlesken jospar qabyldandy. Resmı delegatsııa músheleri ózara saýda-ekonomıkalyq yntymaqtastyqtyń ózekti máselelerin talqylaý úshin ekijaqty kezdesýler ótkizdi.
