Qazaqstan men Túrkııa Transkaspıı arqyly tasymaldy ulǵaıtýǵa múddeli

ASTANA. QazAqparat – Qazaqstan men Túrkııa Transkaspıı halyqaralyq kólik baǵdary arqyly tasymaldy ulǵaıtýǵa múddeli. Bul týraly Aqordada Túrkııa Prezıdenti Rejep Taııp Erdoǵanmen kelissózden keıin BAQ ókilderine arnalǵan brıfıngte Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazir álemdegi geosaıası ahýaldyń kúrdelenip turǵanyn bilesizder. Osy oraıda biz kólik-tranzıt salasynda birlesken naqty sharalar qajet ekenin atap óttik. Bul týraly kózqarasymyz ortaq. Transkaspıı halyqaralyq kólik baǵdary arqyly tasymaldy ulǵaıtýǵa eki el de múddeli. Óńirdegi turaqtylyqty saqtaý úshin bul strategııalyq jobanyń zor mańyzy bar. Bıyl 7 aıda osy baǵyt arqyly tasymaldanatyn júk kólemi 2,5 esege artyp, 1 mln tonnaǵa jetti. Osy rette memleketterimizdiń ortaq dálizdi damytýy qazir óte mańyzdy», - dedi QR Prezıdenti.

Memleket basshysy Túrkııa Prezıdentimen jahandaǵy ózekti máselelerdi talqylaǵanyn atap ótti.

«Kóptegen halyqaralyq máseleler boıynsha eki eldiń ustanymy óte jaqyn ekenin basa aıtqym keledi. Bul biz úshin óte mańyzdy. Sonymen birge halyqaralyq jáne aımaqtyq deńgeıde tyǵyz yqpaldastyqty odan ári jalǵastyrýǵa ýaǵdalastyq. Qazaqstan men Túrkııa - óte jaqyn baýyrlas memleketter. Biz kópjaqty dıplomatııany odan ári nyǵaıtýǵa erekshe mán beremiz. Eki eldiń seriktestigi BUU, Túrki memleketterń uıymy, AÓІSShK sııaqty kópjaqty qurylymdar aıasynda oıdaǵydaı damyp keledi», - dedi Memleket basshysy.

Qasym-Jomart Toqaev erteń Túrkııa Prezıdentimen birge AÓІSShK-niń 6-sammıtine qatysatynyn, is-shara barysynda bul forýmdy tolyqqandy uıymǵa aınaldyrý úderisi bastalatynyn aıtty.

Foto: t.me/bort_01