Qazaqstan men Túrkııa strategııalyq seriktester — Djevdet Iylmaz
ASTANA. KAZINFORM — Eki el arasyndaǵy jan-jaqty qarym-qatynas odan ári nyǵaıtylmaq. Bul jóninde Túrkııa Respýblıkasynyń vıtse-prezıdenti Djevdet Iylmaz QR Premer-mınıstri Oljas Bektenovpen ekijaqty kezdesýde málimdedi.
Ol sózin elimizdiń qonaqjaılyǵyna alǵys aıtýdan bastady.
— Túrkııa Respýblıkasynyń Prezıdenti, qurmetti Rejep Taııp Erdoǵan myrzanyń jáne baýyrlas túrik halqynyń sizderge, sondaı-aq barsha Qazaqstan halqyna joldaǵan ystyq sálemin jetkizgim keledi. Maǵan jáne delegatsııamyzǵa kórsetilgen jyly qabyldaý men qonaqjaılyq úshin shynaıy alǵysymdy bildiremin, — dedi ol.
Sonymen qatar, eki el arasyndaǵy tyǵyz qarym-qatynasqa memleket basshylarynyń súbeli úlesin atap ótti.
— Búgingi deńgeıge jetken yntymaqtastyǵymyzdyń qalyptasýynda memleket basshylary — Rejep Taııp Erdoǵan men Qasym-Jomart Toqaev myrzalardyń saıası erik-jigeri men ortaq kózqarastary sheshýshi ról atqardy. Túrki áleminiń rýhanı ustazy Qoja Ahmet ıAsaýı babamyzdan bastaý alatyn taǵylymǵa súıene otyryp, Qazaqstan jerindegi tereń rýhanı mura aıasynda sizdermen birge bolý — biz úshin úlken mártebe ári qýanysh, — dep málimdedi vıtse-mınıstr.
Djevdet Iylmazdyń sózinshe, Qazaqstan men Túrkııa — strategııalyq seriktester.
— Búgin ótken ekijaqty kezdesýimizdi tek qoldanystaǵy yntymaqtastyqty saralaıtyn tehnıkalyq alań ǵana emes, aldaǵy kezeńniń saýda-ekonomıkalyq baǵyttaryn aıqyndaıtyn strategııalyq keńes alańy retinde qarastyramyz. Túrkııa men Qazaqstan — tek dostas, baýyrlas memleketter ǵana emes, sonymen qatar ortaq tarıhy, mádenıeti, jadysy men bolashaqqa degen kózqarasy toǵysqan strategııalyq seriktester, — dedi ol.
Sondaı-aq ol osy strategııalyq seriktestikti odan ári nyǵaıtý maqsatynda mamyr aıynda Joǵary deńgeıdegi strategııalyq yntymaqtastyq keńesiniń 6-otyrysyn ótkizýdi josparlanyp otyrǵanyn málimdedi.
Aıta keteıik, buǵan deıin Májilis Qazaqstan men Túrkııa arasynda áskerı múliktiń tranzıtine qatysty qujatty qabyldaǵanyn jazǵanbyz.
