Qazaqstan men Túrkııa saýda aınalymyn 15 mlrd dollarǵa jetkizýdi kózdep otyr
ASTANA. KAZINFORM — Qazaqstan men Túrkııa arasyndaǵy saýda-ekonomıkalyq yntymaqtastyqty keńeıtý jáne ózara ınvestıtsııalardy arttyrý baǵytyndaǵy jumys jalǵasady. Bul týraly Túrkııa Respýblıkasynyń vıtse-prezıdenti Djevdet Iylmaz málim etti.
Onyń aıtýynsha, aımaqtaǵy jáne jahandyq ózgerister eki eldiń ózara is-qımylyn kúsheıtýdi talap etedi. Osyǵan baılanysty kólik jáne logıstıka salasy negizgi basym baǵyttardyń biri retinde aıqyndalǵan.
— Kaspıı teńizi arqyly júk tasymalyn arttyrýdan bastap, kedendik rásimderdi jeńildetýge deıingi keshendi sharalar qarastyrylyp otyr. Orta dáliz dep atalatyn baǵytty Túrkııa, Qazaqstan, Ázerbaıjan, Grýzııa sııaqty elderdiń qatysýymen kúsheıtý kózdelýde. Qazirgi jaǵdaıda bul baǵytqa álemdik suranystyń artyp otyrǵany baıqalady, — dedi vıtse-prezıdent.
Sondaı-aq ol energetıka salasyndaǵy yntymaqtastyqtyń strategııalyq mánine toqtaldy.
— Qazaqstan munaıyn álemdik naryqqa jetkizýde Ázerbaıjan men Túrkııanyń rólin arttyrý máselesi qarastyrylýda. Budan bólek, túrik energetıkalyq kompanııalary Qazaqstanda barlaý men óndirýden bastap túrli deńgeıde belsendirek jumys isteýge nıetti, — dedi Djevdet Iylmaz.
Vıtse-prezıdenttiń málimetinshe, eki el arasyndaǵy saýda-ekonomıkalyq baılanys turaqty ósim kórsetip otyr. Ótken jyly taýar aınalymy 10 mlrd dollarǵa jýyqtaǵan.
— Aldaǵy maqsat — bul kórsetkishti 15 mlrd dollarǵa jetkizý. Oǵan ónim túrlerin keńeıtý jáne ınvestıtsııa kólemin ulǵaıtý arqyly qol jetkizemiz, — dedi ol.
Investıtsııalyq ózara is-qımyl da oń dınamıkaǵa ıe. Túrkııadan Qazaqstanǵa 5 myńnan astam kompanııa ınvestıtsııa salyp, onyń jalpy kólemi 5–6 mlrd dollarǵa jetken. Al Qazaqstannan Túrkııaǵa salynǵan ınvestıtsııa kólemi 2 mlrd dollardan asyp, myńǵa jýyq kompanııa jumys istep tur.
— Bul kórsetkishterdi odan ári arttyrý saýda kóleminiń ósýine qosymsha serpin beredi. Sondyqtan eki el de ózara ınvestıtsııalardy ulǵaıtýǵa múddeli, — dedi vıtse-prezıdent.
Aıta keteıik, buǵan deıin Qazaqstan men Túrkııa arasyndaǵy yntymaqtastyq jańa kezeńge ótip, Úkimetaralyq komıssııanyń 14-otyrysy qorytyndysynda 67 tarmaqtan turatyn is-qımyl josparyna qol qoıylǵany habarlanǵan edi.
