Qazaqstan men Túrkııa readmıssııa týraly kelisimge qol qoıdy
ASTANA. KAZINFORM - Astanada ótken TMU-ǵa múshe elderdiń ishki ister mınıstrleri kezdesýi aıasynda Qazaqstan Respýblıkasynyń ishki ister mınıstri Erjan Sadenov pen Túrkııa Respýblıkasynyń ishki ister mınıstri Mustafa Chıftchı ekijaqty kelissóz ótkizdi, dep habarlaıdy Polisia.kz.
Kezdesýdiń basty nátıjesi Qazaqstan men Túrkııa arasyndaǵy readmıssııa týraly kelisimge qol qoıý boldy. Qujat eki eldiń kóshi-qon salasyndaǵy ózara is-qımyldyń quqyqtyq negizin nyǵaıtyp, memleketter aýmaǵynda bolýǵa zańdy negizderi joq adamdardy qaıtarý tártibin aıqyndaıdy.
Kelissóz barysynda Erjan Sadenov pen Mustafa Chıftchı eki eldiń quqyq qorǵaý organdary arasyndaǵy yntymaqtastyqty odan ári damytý máselelerin talqylady. Transulttyq jáne kıberqylmysqa qarsy is-qımyl, izdestirý, kóshi-qon qaýipsizdigi, kadr daıarlaý jáne beıindi bólimsheler arasyndaǵy tikeleı ózara is-qımyl negizgi baǵyttar retinde belgilendi.
– Qazaqstan men Túrkııany baýyrlastyq qarym-qatynas pen ózara senimniń joǵary deńgeıi baılanystyrady. Búginde bul bizdiń vedomstvolar arasyndaǵy naqty ózara is-qımyldan da kórinis tabýda. Qol qoıylǵan kelisim – yntymaqtastyqty nyǵaıtý jolyndaǵy taǵy bir naqty qadam, – dep atap ótti Erjan Sadenov.
Taraptar aldaǵy ýaqytta da bólimsheler arasyndaǵy tikeleı baılanysty damytyp, tájirıbe almasýǵa jáne qaýipsizdiktiń ózekti máseleleri boıynsha birlesken jumysty kúsheıtýge ýaǵdalasty.
Osyǵan deıin Qazaqstannyń sot saraptamasy salasy boıynsha Túrkııamen jáne Qytaımen yntymaqtastyqty nyǵaıtatyny týraly jazdyq.
