Qazaqstan men Túrkııa ózara saýda-sattyq kólemin 15 mlrd dollarǵa jetkizý nıetin rastady
ASTANA. KAZINFORM – Qazaqstan men Túrkııa ózara saýda-sattyq kólemin 15 mlrd dollarǵa jetkizý nıetin rastady. Bul týraly Táýelsizdik saraıynda ótken Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń 6-otyrysynda Túrkııa Prezıdenti Rejep Taııp Erdoǵan aıtty.
- Saýda-sattyq kólemin 15 mlrd dollarǵa deıin jetkizý maqsatymyzdy rastadyq. Osyǵan oraı biz 15 sáýirde Astanada ótken Birlesken ekonomıkalyq komıssııamyzdyń 14-otyrysynda qabyldaǵan is-sharalar josparyn iske asyrýdyń mańyzdylyǵyn atap óttik. Biz kompanııalarymyzdy ınvestıtsııa máselesinde de yntalandyra beremiz. Bıznes forým syndy iskerlik ortany biriktiretin is-sharalarǵa aıryqsha mán beremin. Búgin biz sondaı forýmnyń jabylý rásimine qatysamyz. Kelissóz barysynda energetıka salasyndaǵy yntymaqtastyq ta mańyzdy taqyryptardyń biri boldy, - dedi Rejep Taııp Erdoǵan.
Buǵan deıin Memleket basshysy Qasym-Jomart Toqaev elimizge memlekettik saparmen kelgen Túrkııa Prezıdenti Rejep Taııp Erdoǵandy Táýelsizdik saraıynda resmı qarsy alǵan edi.
Aıta keteıik, otyrys barysynda Qazaqstan Prezıdent qazirgi tańda qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatqanyn, elderimizdiń arasynda eshqandaı túıtkil joq ekenin basa aıtty.
