Qazaqstan men Túrkııa óz ýnıversıtetterinde stıpendııalar usynýǵa ýaǵdalasty

ANKARA. QazAqparat - Prezıdent Qasym-Jomart Toqaevtyń Túrkııaǵa memlekettik sapary aıasynda eki el úkimetteri arasynda bilim berý salasyndaǵy yntymaqtastyq týraly kelisimge qol qoıyldy. Bul týraly QR Bilim jáne ǵylym mınıstri Ashat Aımaǵambetov áleýmettik jelidegi paraqshasynda jarııalady, dep habarlaıdy QazAqparat.

«Kelisimniń basty baǵyttary: oqytýshylardyń, pedagogterdiń jáne bilim berý uıymdary basshylarynyń tájirıbe almasýy. Bilim berý salasynda jańa tehnologııalardy qoldaný boıynsha tájirıbe almasý. Ózara negizde bilim alýshylardyń ǵylymı jáne mádenı jobalarǵa qatysýyn yntalandyrý. Ǵylymı zertteýler men konferentsııalar ótkizý. Birlesken baǵdarlamalar negizinde bilim berý mekemeleri arasyndaǵy yntymaqtastyqty damytý. Jastar saıasaty salasyndaǵy yntymaqtastyqty damytý», - dep jazady mınıstr.

Sonymen qatar, Qazaqstan men Túrkııa óz ýnıversıtetterinde joǵary jáne (nemese) joǵary oqý ornynan keıingi bilim alý úshin stıpendııalar usynady.

Mınıstr atap ótkendeı, sapar barysynda bıyl Túrkııadan Qazaqstanǵa ótkiziletin Halyqaralyq Túrki akademııasynyń Ǵylymı keńesine tóraǵalyq etý máseleleri talqylandy.

Eske salsaq, Qazaqstan men Túrkııa qorǵanys yntymaqtastyǵyn tereńdetý joldaryn talqylady. Qazaqstan men Túrkııa arasynda Áskerı yntymaqtastyq týraly kelisimge qol qoıyldy.