Qazaqstan men Túrkııa medıasy aqparattyq yntymaqtastyqty keńeıtpek
ASTANA. KAZINFORM — Qazaqstannyń Ystanbuldaǵy Bas konsýly Nýrıddın Amanqul Túrkııanyń jetekshi medıa holdıngteri – İhlas Medya, Demirören Medya jáne Albayrak medya kompanııalarynyń quraldarynyń basshylary men jýrnalısterimen kezdesý ótkizdi. Bul týraly SІM málim etti.
Kezdesýler barysynda Bas konsýl Qazaqstandaǵy jańa Konstıtýtsııa jobasynyń negizgi erejeleri men eldegi konstıtýtsııalyq reformalardyń máni týraly keńinen aqparat berdi.
Atap aıtqanda, konstıtýtsııalyq ózgeristerdiń memlekettik basqarý júıesin jańǵyrtýǵa, bılik tarmaqtary arasyndaǵy tepe-teńdik pen ózara baqylaýdy kúsheıtýge baǵyttalǵany atap ótildi. Sonymen qatar, jańa Konstıtýtsııa azamattardyń quqyqtary men bostandyqtaryn qorǵaý tetikterin nyǵaıtyp, qoǵamnyń saıası ómirine azamattardyń qatysý múmkindikterin keńeıtetini aıtyldy.
— Bul ózgerister Qazaqstanda «Ádiletti Qazaqstan» qaǵıdattaryn qalyptastyrýǵa jáne demokratııalyq ınstıtýttardy odan ári damytýǵa negiz bolatyny atalyp ótti. Túrkııa medıa ókilderi Qazaqstandaǵy saıası jańarý úderisine qyzyǵýshylyq bildirip, júrgizilip jatqan reformalardyń eldiń turaqty damýy men óńirlik yntymaqtastyqty nyǵaıtýdaǵy mańyzyn atap ótti, — delingen habarlamada.
Kezdesýler qorytyndysynda taraptar Qazaqstan men Túrkııa arasyndaǵy aqparattyq yntymaqtastyqty keńeıtý, sondaı-aq Qazaqstandaǵy reformalar men qoǵamdyq-saıası ózgerister týraly túrik aýdıtorııasyna keńinen aqparat taratý máseleleri boıynsha ózara is-qımyldy jalǵastyrýǵa daıyn ekenderin bildirdi.
Eske sala keteıik, buǵan deıin Qazaqstan men Túrkııa Syrtqy ister mınıstrleri Taıaý Shyǵystaǵy ahýaldy talqylaǵanyn jazǵan edik.
