Qazaqstan men Túrkııa Lıvandaǵy bitimgershilikke qatysty kelisimge kelmek
ASTANA. KAZINFORM – Qazaqstan men Túrkııa BUU-nyń Lıvandaǵy Ýaqytsha kúshteri aıasyndaǵy bitimgershilik mıssııasy boıynsha kelisimge kelýdi josparlap otyr. Bul týraly Úkimettiń tıisti qaýlysynda aıtylǵan.
Qujatqa sáıkes, taraptar arasyndaǵy ózara is-qımyldy kózdeıtin Tehnıkalyq kelisim jobasy maquldandy.
1. Qazaqstan Respýblıkasy Úkimeti men Túrkııa Respýblıkasy Úkimeti arasyndaǵy BUU-nyń Lıvandaǵy Ýaqytsha kúshteri mıssııasy sheńberindegi yntymaqtastyq týraly Tehnıkalyq kelisimniń qosa berilip otyrǵan jobasy maquldansyn.
2. Qazaqstan Respýblıkasy Premer-mınıstriniń orynbasary – Ulttyq ekonomıka mınıstri Jumanǵarın Serik Maqashulyna Qazaqstan Respýblıkasy Úkimetiniń atynan joǵaryda atalǵan tehnıkalyq kelisimge qol qoıýǵa, sondaı-aq mazmuny jaǵynan eleýli ózgerister ákelmeıtin túzetýler men tolyqtyrýlar engizýge ókilettik berilsin, – delingen úkimet qaýlysynda.
Kelisimniń maqsaty taraptardyń mindettemeleri men qabyldaýshy taraptyń qoldaý kórsetýine baılanysty jalpy qaǵıdattar men rásimderdi aıqyndaý. Osyǵan sáıkes, qazaqstandyq áskerı qyzmetshiler Túrkııa Respýblıkasy Qarýly kúshterimen birlesip, BUU-nyń Lıvandaǵy Ýaqytsha kúshteri mıssııasyna qatysyp jatqan áskerı kemelerde ornalastyrylady dep atap ótilgen qujatta.
Qaýly zańdy túrde kúshine endi.
Buǵan deıin, Qazaqstan men Túrkııa bir-birine qoldaý kórsetýge ýaǵdalasqanyn jazǵanbyz.
Sondaı-aq Eki eldiń áýe keńistigi arqyly áskerı múlik pen personaldy tranzıtteý jónindegi Túrkııamen kelisimge qol qoıý týraly Qazaqstan Úkimetiniń 2024 jylǵy 11 qyrkúıektegi qaýlysy qabyldanǵanyn habarlaǵanbyz.