Qazaqstan men Túrkııa ǵalymdary Bozoq qalashyǵyn zertteıdi
ASTANA. KAZINFORM – «Bozoq» memlekettik tarıhı-mádenı mýzeı-qoryǵynda Túrkııa Respýblıkasynyń Sorgýn qalasynan kelgen delegatsııa ókilderimen kezdesý ótti. Kezdesýde Bozoq qalashyǵyn zertteý aıasyndaǵy ǵylymı yntymaqtastyqty odan ári damytý máseleleri sóz boldy.
Taraptar ortaq zertteýler júrgizý, tarıhı jáne arheologııalyq materıaldardy zerdeleý, sondaı-aq Qazaqstan men Túrkııa ǵalymdarynyń tájirıbe almasý múmkindikterin talqylady.
Sonymen qatar jıynda Bozoq qalashyǵynyń tarıhı-mádenı qundylyqtaryn dáripteý, tereńirek zertteý jáne ǵylymı baılanysty jalǵastyrý jaıy aıtyldy.
Sapar barysynda delegatsııaǵa ashyq aspan astyndaǵy Ulttyq park jobasy boıynsha atqarylǵan jumystar tanystyryldy. Mádenıet jáne aqparat mınıstrligi málimetinshe, delegatsııa ókilderi jobany odan ári damytý jospary týraly aqparat aldy.
Buǵan deıin «Bozoq» mýzeı-qoryǵyn salý jumystary qalaı júrip jatqanyn jazǵan edik.
Kóne Bozoq qalashyǵyn qaıta qurý jáne arheologııa eskertkishteriniń túpnusqalyǵyn saqtaı otyryp, botaı, saqtar, ǵundar, túrkilerdiń tarıhı keshenderin qalpyna keltirýge baǵyttalǵan aýqymdy joba – «Bozoq» ulttyq parkiniń qurylysy tórt jyl buryn bastalǵan edi.
