Qazaqstan men Túrkııa eki eldiń áskerılerine birdeı jaǵdaı jasaıdy

ASTANA. QazAqparat - Búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy ótip, onda «Qazaqstan Respýblıkasynyń Úkimeti men Túrkııa Respýblıkasynyń Úkimeti arasyndaǵy arnaıy maqsattaǵy bólimshelerdiń oqý-jattyǵýlaryn ótkizý kezinde qabyldaýshy taraptyń qoldaý kórsetýi týraly ózara túsinistik memorandýmyn ratıfıkatsııalaý týraly» zań jobasy talqylandy, dep habarlaıdy QazAqparat.

«Momorandýmǵa ótken jyly 20 qańtarda qol qoıyldy. Qujattyń maqsaty taraptardyń mindettemeleri men jaýapkershiligin belgileý bolyp tabylady. Sonymen qatar oqý-jattyǵý ótkizý kezinde qabyldaýshy taraptyń qoldaý kórsetýiniń negizgi qaǵıdattaryn aıqyndaıdy»,-dedi zań jobasyn tanystyrǵan QR Qorǵanys mınıstriniń orynbasary Talǵat Muhtarov.

Memorandýmnyń erejelerine sáıkes, oqý-jattyǵý ótkizý barysynda qabyldaýshy tarap jiberýshi jaqtyń bólimshelerine tehnıka men qarý-jaraqty ákelýde, memleket ishinde alyp júrýde, joldardy paıdalanýda ruqsat etedi. Sondaı-aq jeke quramdy qamtamasyz etip otyrǵan sapada jiberýshi taraptyń bólimshesin tegin ornalastyrady. Janarmaı, kólik jáne baılanys quraldary beriledi, medıtsınalyq baǵytta qyzmetter kórsetiledi.

«Óz kezeginde jiberýshi taraptyń bólimshesi qabyldaýshy memlekettiń zańnamasyn jáne oqý-jattyǵýlardy ótkizýdiń josparynda naqtylanǵan rásimderdi saqtaıdy. Jattyǵýlar Qazaqstan men Túrkııa qarýly kúshteri arnaıy maqsattaǵy bólimsheleriniń kásibı deńgeıiniń jaýyngerlik daıarlyǵyn arttyrýǵa yqpal etetin bolady. Sondaı-aq áskerlerdiń arasyndaǵy ózara is-qımyl máselelerin pysyqtaýǵa múmkindik beretinin atap ótken jón»,-dedi T. Muhtarov.

Óz kezeginde Senat depýtaty Muhtar Altynbaev qujattyń mindeti eki el qarýly kúshteriniń arnaıy maqsattaǵy bólimsheleriniń birlesken oqý-jattyǵýlaryn ókizýmen baılanysty máselelerdi egjeı-tegjeıli retteıtinin atap ótti.

Talqylaýdan soń komıtet músheleri zań jobasyn palatanyń jalpy otyrysyna shyǵarý týraly sheshim qabyldady.