Qazaqstan men Túrkııa birlesip vaktsına ázirleý týraly kelisimge qol qoımaq
«Qazaqstan Respýblıkasynyń Úkimeti men Túrkııa Respýblıkasynyń Úkimeti densaýlyq saqtaý salasyndaǵy yntymaqtastyqty teńdik jáne ózara paıda qaǵıdattaryn negizge ala otyryp jetildiredi jáne nyǵaıtady», - delingen qujatta.
Kelisimde jazylǵandaı, taraptar myna baǵyttar boıynsha yntymaqtastyqty arttyrýǵa múddeli:
- pandemııany qosa alǵanda, ınfektsııalyq jáne ınfektsııalyq emes aýrýlarmen kúres;
- medıtsına jumyskerlerin oqytý men olardyń biliktiligin arttyrý jáne ana men bala ólimin bolǵyzbaý úshin jańa týǵan nárestelerdi reanımatsııalaý baǵdarlamalaryn ázirleý;
- Túrkııanyń Densaýlyq saqtaý mınıstrligi QR Densaýlyq saqtaý mınıstrligimen birlesip, Túrkııadaǵy Joǵary bilim keńesiniń arasynda oqytýshylar quramynyń akademııalyq utqyrlyǵyn júzege asyrýǵa baılanysty járdemdesýdi qamtamasyz etedi;
- memlekettik medıtsınalyq uıymdardyń aýrýhanalaryn basqarý júıesi;
- densaýlyq saqtaý statıstıkasyn jaqsartý;
- medıtsınalyq kórsetiletin qyzmetterdiń sapasy jáne densaýlyq saqtaý salasyndaǵy akkredıtteý;
- meıirgerlik qyzmet boıynsha yntymaqtastyq;
- farmatsevtıkalyq qyzmet, medıtsınalyq buıymdar, jabdyqtar jáne vaktsınalardy ázirleý salasyndaǵy yntymaqtastyq, aqparat pen tájirıbe almasý;
- densaýlyq saqtaý salasyndaǵy zańnamany ázirleýde bilim men tájirıbe almasý;
- tájirıbe almasý jáne birlesken qyzmetti odan ári damytý maqsatynda sarapshylar men densaýlyq saqtaý jumyskerlerimen almasýǵa erekshe nazar aýdara otyryp, óz uıymdarynyń arasyndaǵy tikeleı yntymaqtastyqty ózara nyǵaıtý;
- Dúnıejúzilik densaýlyq saqtaý uıymyn, Islam yntymaqtastyq uıymyn jáne Túrki Memleketteri uıymyn qosa alǵanda, densaýlyq saqtaý salasynda jumys isteıtin halyqaralyq uıymdarmen yntymaqtastyq;
- memlekettik-jekeshelik áriptestikti qosa alǵanda, ártúrli ınvestıtsııalyq modelder sheńberinde densaýlyq saqtaýǵa ınvestıtsııalar salasynda jáne yntymaqtastyq múmkindikterin zerdeleý, ázirleý, engizý jáne tájirıbe almasý;
- memleketerdiń tsıfrlyq densaýlyq saqtaý salasyndaǵy ozyq praktıkasyn qoldaný jáne damytý.
Osy yntymaqtastyq aıasynda tájirıbe almasý úshin eki el mamandaryna kezdesýler, bıznes-forýmdar, kórmeler, kongrester uıymdastyrylady. Oǵan qatysýǵa baratyn tarap óz delegatsııasynyń shyǵyndaryn tolyq óteıdi.
«Kelisim 5 jyl boıy kúshinde qalady. Eger taraptardyń bireýi ekinshi tarapty óziniń osy kelisimniń qoldanysyn toqtatýǵa nıeti týraly ol aıaqtalǵanǵa deıin alty 6 aı buryn dıplomatııalyq arnalar arqyly jazbasha nysanda habardar etpese, osy kelisim kelesi 1 jylǵa avtomatty túrde uzartylady», - dep jazylǵan kelisim jobasynda.
Qujat 18 sáýirge deıin kópshilik talqylaýda bolady. Keıin qol qoıý úshin eki eldiń Úkimet basshylaryna joldanady.
