Qazaqstan men Túrkııa birlesip tarıhı telehıkaıa túsiredi

NUR-SULTAN. QazAqparat - Qazaqstan men Túrkııa ortaq telehıkaıa men fılm túsirýge nıetti. Qos tarap oǵan qoldaý bildirip, jan-jaqty kómek kórsetýge ázir ekenin málimdedi. Bul týraly Aqparat jáne qoǵamdyq damý mınıstri Aıda Balaevanyń Túrkııanyń memlekettik TRT teleradıokorporatsııasynyń basshylyǵymen bolǵan kezdesýinde aıtyldy, dep habarlaıdy QazAqparat Habar 24 telearnasyna silteme jasap.

Aqjoltaı habar Qazaqstan Prezıdenti Qasym-Jomart Toqaevtyń Túrki Keńesi beıresmı sammıtinde ortaq mádenı-aǵartýshylyq keńistik qalyptastyrý qajet degen tapsyrmasyna sáıkes júzege aspaq.

«Qazaqstan men Túrkııa birlesip, tarıhı fılm men telehıkaıa túsirmek. Bul jobany elimizdiń jáne túriktiń memlekettik telearnalary men jetekshi mamandary júzege asyrmaqshy. Kórermenge qysqa ýaqytta jol tartatyn týyndy Qazaqstan men Túrkııada túsiriledi. Meniń qazir aıaq basyp turǵan jerim reıtıngi joǵary «Seljýk memleketiniń jandanýy» telehıkaıasynyń túsirilim alańy. Tap osy sekildi túsirilim pavılondaryn aldaǵy ýaqytta Ystanbul men qazaq elinen kórýge bolady», - dedi tilshi Merýert Qanaǵat.

Túrkııaǵa jumys saparymen kelgen mınıstr Aıda Balaeva Ystanbulda ornalasqan TRT teleradıokorporatsııasynyń kınostýdııa qalashyǵyn aralady. Túsirilim mekenderin óz kózimen kórgen mınıstr, sala mamandarynan jan-jaqty aqparat alyp, ortaq telehıkaıa men fılm túsirý boıynsha pikir almasty. Eki elge ortaq tulǵalar jaıly sóz qozǵap, sapaly jobalardy júzege asyrý qajettigi aıtyldy. Túriktiń belgili prodıýseri Emre Konýk, birlesip jumys isteýge daıyn ekenin jetkizip, Qazaqstannyń tumsa tabıǵatynda tarıhı fılmderdi túsirýge qyzyǵýshylyq bildirdi.

«Aldaǵy ýaqytta 6 bólimnen turatyn Alyp-Arslan tarıhı telehıkaıasyn túsirmekpiz. Týyndydaǵy soǵys alańdary men jazyq dala kórinisterin Qazaqstanda túsirýdi josparlap otyrmyz. Búgingi kezdesýde mınıstr Aıda Balaevamen osy jobany jan-jaqty talqyladyq. Sonymen qatar Qorqyt Ata jaıly fılm túsiretin kez keldi. Tórtkúl dúnıe uly tulǵalarymyzdy tanýy tıis. Urpaqtary retinde bul bizdiń boryshymyz», - prodıýser Emre Konýk.

Halyqaralyq «TRT» kınostýdııa qalashyǵy shamamen 50 gektarǵa jýyq alańda ornalasqan. Onyń 12 gektary ormandy alqap bolsa, qalǵan terrıtorııasyna tarıhı qamaldar men shahar turǵyzylǵan. Qazir munda birneshe tarıhı serıaldardyń túsirilim toby jumys istep júr. Olardyń arasynan elimizdiń kaskaderlerin kezdestirip, dombyranyń únin tyńdaýǵa bolady. Aıta keterligi, sońǵy jyldarda qazaqtyń dombyrasy jergilikti kınotýyndylardyń saýntrekterinde jıi estilip júr.

«Halyqaralyq «TRT» kınostýdııa qalashyǵynyń qurylysyn bir jyl buryn bastadyq. Búgin bir bóligin qazaqstandyq delegatsııamen aralap, ortaq jobany júzege asyrý jóninde pikir almastyq. Qazirde qazaqstandyq «Nomad» kaskaderleri men «Hassaq» etno-folklorlyq ansamblimen jumys isteımiz. Tarıhymyz bir. Sondyqtan ortaq jobany júzege asyrsaq dep armandaımyz», TRT túsirilim qalashyǵynyń dırektory ıAhııa Taııp Aıdenız.

Túrkııa búkil álem boıynsha telehıkaıa eksporynda ekinshi orynda tur. 2018 jyly shetelge satylǵan túrik týyndylarynyń quny 500 mıllıon dollar boldy. Tek qana «Súleıman Sultan» telehıkaıasyn 700 mıllıonnan astam kórermen tamashalaǵan. Sonda da alystaǵy aǵaıyn bul kórsetkishti eseleýge nıetti. Sala mamandary kınoındýstrııadan tabysty 2023 jyly 1 mıllıon dollarǵa jetkizýge bel býyp otyr.