Qazaqstan men Túrkııa áskerı saladaǵy qupııa aqparattardy ózara qorǵaýǵa kelisti
ASTANA. QazAqparat - Búgin Elbasy Nursultan Nazarbaev pen Túrkııa Prezıdenti Rejep Taııp Erdoǵan arasyndaǵy kelissózderden keıin eki eldiń arasynda birqatar qujatqa qol qoıyldy, dep habarlaıdy QazAqparat tilshisi.
Atap aıtqanda, QR Aýyl sharýashylyǵy vıtse-mınıstri Erlan Nysanbaev pen Túrkııa Aýyl sharýashylyǵy jáne orman sharýashylyǵy mınıstri Bekır Pakdemırli QR Aýyl sharýashylyǵy mınıstrligi men Túrkııa Aýyl jáne orman sharýashylyǵy mınıstrligi arasyndaǵy aýyl sharýashylyǵy salasyndaǵy yntymaqtastyq jóninde memorandýmǵa qol qoıdy. Al QR Qorǵanys mınıstri Nurlan Ermekbaev pen Túrkııa Ulttyq qorǵanys mınıstri Ýlýsı Akar eki qujatty rásimdedi. Olar: Qazaqstan Respýblıkasy Úkimeti men Túrkııa Respýblıkasy Úkimeti arasyndaǵy áskerı yntymaqtastyq týraly jáne Qazaqstan Respýblıkasy Úkimeti men Túrkııa Respýblıkasy Úkimeti arasyndaǵy áskerı saladaǵy qupııa aqparatty ózara qorǵaý týraly kelisimder.
Munan bólek, QR Mádenıet jáne sport mınıstri Arystanbek Muhamedıuly men Túrkııa Mádenıet jáne týrızm mınıstri Mehmed Ersoı Qazaqstan Respýblıkasy Úkimeti men Túrkııa Respýblıkasy Úkimeti arasyndaǵy mádenı ortalyqtardy qurý jáne olardyń qyzmeti týraly kelisimge qol qoıdy. QR Investıtsııalar jáne damý mınıstri Jeńis Qasymbek pen Túrkııa Syrtqy ister mınıstri Mevlýt Chavýshoglý «Jańa sınergııa» birlesken ekonomıkalyq baǵdarlamasy josparyn ózektendirý hattamasyna rásimdedi.
